無行葵廣一排，發現小食店又大執位！上年 12 月開嘅五代同糖，變咗做日式鐵板燒，唔賣雞蛋布甸轉賣炒和牛粒。食物全部即席在鐵板燒炒起，鑊氣飄埋嚟好鬼吸引，最正係本來矜貴的鐵板燒賣價突然平民化，人人吃得起。
葵廣級的日式鐵板燒，製作都相當認真。招牌作「一口和牛」選用鹿兒島和牛，於鐵板煎至半熟，配吸收了和牛粒油香的多士片，和牛粒多汁、牛味突出。豪啲仲有「大黑魔蟹盛」，原隻蟹蓋釀滿蟹肉、蟹膏、薯蓉、明太子及蟹籽，再將炸蟹箝及蟹柳放旁邊，砌返個蟹型出嚟，賣相霸氣！仲有廣島蠔、皇帝蟹及即燒串燒牛舌食，食材係矜貴喎，但不少$50有找，試得過。
鹽燒牛舌、照燒五花腩 $13 串
五花腩油脂甘香；牛舌先以海鹽及黑胡椒醃味再煮 1 小時，燒烤時再掃上醬汁，十分軟腍。
大黑魔蟹盛 $43
賣相夠霸氣！原隻蟹蓋釀滿蟹肉、蟹膏、薯蓉、明太子及蟹籽，薯蓉軟滑富蟹膏香。
黃金芝士燒廣島蠔 $28
鐵板炒過的廣島蠔，加 Moralliza、車打芝士及蛋黃醬後燒香，惹味得很，但廣島蠔身較細。
皇帝蟹極上豚肉卷配日式燒汁炒麵 $32
即叫即炒的日式炒麵，配醬油炒勻好惹味！豚肉片卷入皇帝蟹棒，大份得要同朋友仔些牙。
大黑牛魔皇 $45
選用鹿兒島和牛，放鐵板煎香，牛粒油脂十足、牛味濃郁。
大黑魔燒
地址：葵涌廣場 3 樓 TOP 世界 3069-T16-17 號舖
電話：從缺
營業時間：11am - 10pm
原文刊載自U Magazine
