荃灣小店林立，附近街坊、學生最愛的當然是平價小食。新開張近三個月的食店SJ Burger則主打較貴價的食物，吸引到的反而是周圍的上班族光顧。
鹹食正餐首選一定是安格斯漢堡(單點$68 套餐連飲品及薯條$78)，自家製漢堡好厚身，即叫即煎配上煮好的甜洋蔥，細食的話食半個都夠哂滿足。
安格斯漢堡扒大大塊，煎煮都需時，點餐後都要等約10-15分鐘時間。
漢堡包超巨型，女仔切開一半食會較方便，提提大家趁熱食先可以保存最多肉汁~
薯條即叫即炸，黑松露薯條(單點$25，套餐轉配加$8)香味十足，黑松露醬香濃，抵食！
最吸引的是脆脆華田心太軟($30)，流心餡料及蛋糕都加入了Oreo脆脆，口感豐富。
一切開餡料就流出，朱古力味香濃，味道偏甜，朱古力迷記得試試~
甜食控可以點最近大熱的原味梳乎厘班戟拼雪糕($28)，先將梳乎厘放入焗爐焗8-10分鐘，再輕煎面層，與其他店的梳乎厘製法有點不同。
梳乎厘四邊微脆，口感軟綿綿，空氣感不算太重，不過蛋香味就相當濃郁。
鍾意飲咖啡的朋友，可以試試期間限定的朱古力咖啡味梳乎厘班戟($35)，咖啡味頗重但不怕苦。
SJ Burger
地址:荃灣鱟地坊80-84號華成樓B座地下B4號舖
開放時間:11:30-22:30
電話:5108-0755
