「卅二公館」（Mott 32）由Ball 后薛芷倫投資，早前蘇永康、葉童、余安安、琦琦及熊黛林已率先捧場，星光熠熠。選址中環渣打銀行大廈地庫，佔地更超過 7,500 平方呎，還設半開放式廚房，有如直播 Cooking Show，用超過 2,000 萬打造，放眼盡是古董！名媛才俊等都來朝拜。
餐廳幕後班底同樣強勁，請來曾任「滿福樓」副總廚的馮師傅掌勺，點心與中菜都用世界級的靚料，如西班牙黑毛豬、日本鹿兒島黑豚、法國走地雞等，除不賣魚翅外，更選用屬可持續海鮮的南澳龍蝦、紐西蘭帶子等。
卅二公館貴為頂級食府收費自然不低，所以精明點，母親節不妨帶媽媽來歎茶。主餐牌全日供應，以粵菜為主，點心約有 20 多款，傳統款式換上靚料，味道賣相都升級，像南澳帶子燒賣、蟹肉魚子醬小籠包、澳洲和牛千絲酥、黑毛豬叉燒包及龍蝦餃等。不可不試的，還有限量供應的西班牙黑毛豬叉燒，以豬後頸肉炮製，更鬆化甘香，貴氣媽媽一定鍾意。
南澳帶子燒賣 $85
這裏連燒賣都有 3 款，這款用上鮮甜帶子配豬肉，質感爽滑。
蟹肉魚子醬小籠包 $95/4件
將豬肉跟蟹肉混合做餡料，份外鮮甜，還以魚子醬點綴，矜貴又鹹香。
蜜汁頂級西班牙黑毛豬叉燒 $295
用上 Iberico 黑毛豬的後頸肉炮製，鬆化甘香富肉汁，卻不會過膩。每天限量供應，一碟難求。
澳洲和牛千絲酥 $70
酥點手工精細，以用黑椒汁煮過的澳洲和牛做餡，濃郁滋味。
生煎韭菜粿 $55
煎得外皮香脆，內裏有蝦及韭菜作餡，惹味！
陳年黑醋雲耳海蜇頭 $180
清新開胃的小碟，醋香馥郁不嗆鼻，雲耳青瓜海蜇頭，恰如其份的爽脆。
餐廳布置華麗，用上 2,000 萬打造，富紐約工業味但又不失華麗，單是大廳，已令人眼前一亮。設多間貴賓房，私隱度高；這房間就以毛筆作裝飾，富中國色彩。
孝順女兒 Mega
「媽媽開花店，每逢母親節都會好忙，慶祝活動都係一家人食餐飯，有試過送花畀媽媽，佢好開心。」
花店 Tiffany Flowers 老闆 Tiffany
「母親節通常比較忙，要等收工先去食飯，不過，兩個女都好乖，經常氹我開心，節日點過都無所謂啦。如果係飲茶，呢間中菜廳好靚，點心好味得來唔油膩，啱晒我哋幾母女口胃。」
卅二公館＿
地址：中環德輔道中 4-4A 號渣打銀行大廈地庫
電話：2885 8688
(原文摘自《U Magazine》文：Pam、Sieg、圖：Jay、Nova、Paul、Sky)
