嚴選4大世界盃睇波Bar

今屆世界盃賽事大部分都在半夜深宵時段直播，出街睇波的選擇少了很多。不過，唔使擔心，我們已為大家搜羅了方便就腳又有直播球賽的酒吧餐廳，大家可以同一大班球迷邊食邊飲邊睇波，氣氛一樣熱鬧！

英格蘭球迷主場 - Yorkshire Pudding Restaurant

睇波要有氣氛，梗係要去中環蘭桂坊蘇豪一帶，酒吧夠集中又多老外，一入波，成條街一齊狂歡呼，不知幾震撼！芸芸酒吧中，Blogger Saii 及 Stone 揀了英式酒吧餐廳 Yorkshire Pudding，「眾所周知，英國球迷出名狂熱，睇波分分鐘緊張過球員，氣氛特別投入，來睇英格蘭的賽事最好不過。」

這裏不論裝潢與菜式都是 100% 英倫風格，門面是一身醒目紅裝，以倫敦巴士作藍圖，樓高兩層，上下層分別是餐廳和酒吧，兩層都設有投射大電視，睇波一流。這裏供應的食材如肉類、香腸、芝士等均來自英國，保持英式的地道風味。直播球賽的晚上主要供應英式小食，如蘇格蘭炸蛋、Yorkshire Pudding（約克郡布丁）、炸芝士、迷你漢堡等，全部都是自家心機製，調味並無大灑香料，半夜吃來不會過分 heavy，6am 的賽事更會有早餐供應，補充元氣返工啱啱好。必試的有傳統炸魚薯條，用上紐西蘭多寶魚，魚味較鮮濃，炸漿特別加入 London Pride 啤酒來做，鬆化又夠香，配以自家製他他醬、手切薯條、青豆，分量大大份，同朋友 share 最啱。除了地道英國菜，大廚亦特別於世界盃期間推出兩款巴西國食，一款是 Acaraje，用上巴西黑眼豆，混入辣椒粉、蒜等搓成豆泥再炸，釀入炒香的蝦，味道微辣香口；另一款 Coxinhas 則以麵粉包着雞胸肉、粟米及酸忌廉來炸，食落酸香惹味，再來一杯巴西 cocktail，充滿特色。

Blogger 分享
Saii：「睇波我鐘意約埋朋友去酒吧餐廳睇，一來氣氛好，二來餐廳又會推出特色菜，好似今年就有唔少巴西小食，好特別。」
Stone：「一有重要賽事我都會同朋友出去餐廳睇，成班人一齊嗌，特別過癮！」

Coxinhas $88
以麵粉包着雞胸肉、粟米及酸忌廉來炸，味道酸香惹味，一口一件剛剛好。

Classic Scotch Eggs $88
雞蛋以免治豬肉包着來炸，入口香口惹味，加上半流心的蛋黃，傳統英式的味道。

Steak and Guinness Pie $178
酥皮極香脆，內裏是以黑啤及紅酒燴煮的牛腩肉、雜菜、蘑菇等，牛肉入味軟腍，味道很香濃。

Mini Beef Burger $58
漢堡扒以美國安格斯牛肉打成，肉味香濃又 juicy，加上自家製的麵包、車打芝士、番茄等，簡單好吃。

Traditional Fish and Chips $168
炸漿特別加入 London Pride 啤酒來做，鬆化又夠香，內裏的紐西蘭多寶魚嫩滑，魚味鮮濃，配以自家製他他醬、手切薯條及薄荷青豆，是地道的英式風味。

Acaraje $108
用巴西產的黑眼豆，混入辣椒粉、蒜等搓成豆泥再上麵包糠來炸，外脆內綿，加上炒香的蝦，微辣香口，佐酒一流。

Caiprinha $68
以傳統巴冧酒 Cachaca、青檸、黑糖及冰調成，酒味頗濃帶酸，after taste 帶黑糖的甜香。

Yorkshire Pudding Restaurant
地址：中環蘇豪士丹頓街 6、8 號
電話：2536 9968

旺角bar 任揀40款美食 - The Sky Bar

24 小時不夜天的旺角，交通四通八達，附近酒吧又多，是不少球迷的睇波熱點。不過，劈場酒吧品流複雜，我推介大家去朗豪坊的 The Sky Bar，交通最方便，而且採半開放式設計，感覺開揚舒適，最重要是店內沒有骰盅，亦不准猜枚，只有 3 部超大高清投射電視，人人專心等睇入波！酒吧內亦擺有一張英式桌球枱，未開波時仲可先跟朋友篤番盤波熱下身。

雖然酒吧沒有播足 64 場，但凌晨 12 點場及決賽就鐵定會直播，到時仲會供應 Full Menu，一直供應到半場休息。食物嘛，由小食、頭盤、主菜至甜品等有成 40 款選擇，款式夠多，半夜餓鬼上身都唔使擔心。炸芝麻脆衣雞翼、啤酒洋葱圈、香脆炸夏伴泰式汁等香口小食配啤酒就最啱；要飽肚的可以揀白酒忌廉煮黑青口配法包、扒海鮮黑松露意大利飯，甚至鋸客美國極黑豚骨扒都得，夠晒招積。值得一讚的是有酒精或不含酒精的雞尾酒超過 100 款，不勝酒力的女士亦可飲得盡興。

Tower $335-$360
足球造型的啤酒塔，一個足有 2.5 公升啤酒，可自選生啤，最啱一大班朋友睇波自斟自飲。

西班牙辣椒蒜香炒鮮魷魚 $108
新鮮的魷魚加入羅勒、辣椒、蒜片、銀魚柳等來炒，辣辣哋帶鹹香，非常惹味。

黑青口配法包 $218
澳洲黑青口細嫩鮮甜，以紫洋葱、法式細葱、白酒、忌廉等來煮，一揭蓋即香氣撲鼻，用法包蘸汁來吃，滿嘴鮮味。

香脆啤酒洋葱圈 $98
大大個的洋葱圈，炸漿做得鬆脆，洋葱肥厚又香甜，是啤酒最佳配搭。

炸芝麻脆衣雞翼 $118
雞翼先用日本豉油及芝麻醃過，再上芝麻脆皮炸香，面層撒滿炸蒜，香脆又入味，好吃得連骨都吮埋。

法式焗蘋果脆酥伴香子蘭雪糕 $98
香脆酥皮內是原個用肉桂、白酒燴過的青蘋果，口感微爽，酸香怡人，配搭呍呢嗱雪糕來吃，一冷一熱的很美味。

Blue Lagoon $78、Zombie $78、Grassland $78（右至左）
以巴西國旗顏色設計的 cocktail，襯晒今年世界盃主場。Blue Lagoon 以伏特加、藍橙酒、檸檬汁等調成，酒味較重；Zombie 帶杏脯及菠蘿甜香，果味豐富；Grassland 則混合日本燒酎、蜜瓜酒及薄荷，味道很 refreshing。

董嘉儀 LuLu (大埔LuLu)：「呢度最啱同一大班朋友約埋睇波，方便就腳，又有超大熒幕，氣氛特別好。」

The Sky Bar
地址：旺角朗豪坊 13 樓 1 號
電話：3514 4448

標準球迷聖地 - Dickens Bar 雙城吧

港島區睇波，最方便當然是銅鑼灣，老牌英式酒吧 Dickens Bar 是我的心水。一室英式典型深啡木質裝潢，加上球隊波衫掛滿牆壁，是標準球迷的聚腳地。全場有兩部 100 吋投射電視及 6 部 46 吋 LCD 電視，遍布每一角落，坐邊都保證不會錯過任何一個精采鏡頭；加上來的都是一心一意睇波的球迷，旁邊唔會有人玩骰盅猜枚，氣氛好！

半夜三更睇波，當然要有食物醫下肚，這裏的出品水準高，雖然世界盃賽事期段只供應 6 款小食，但全都是店家的招牌菜，像墨西哥玉米片，上面鋪滿自家製的辣肉醬、車打芝士、水牛芝士、番茄莎莎及牛油果醬，大大份又足料；Dicken's Breakfast 有齊英式血腸、豬肉腸、煙肉、煎太陽蛋、薯餅、番茄、焗豆及多士，是 classic 的配搭。另外，還有薯條配咖喱醬、雙城吧特級漢堡、辣水牛雞翼配藍芝士醬等，配埋超過 90 款來自各國的啤酒，邊飲邊食邊睇波，氣氛一定更高漲。

Dicken's Breakfast $168
地道的英式早餐，有英國直送的香腸、血腸、煙肉、煎太陽蛋、薯餅、番茄、焗豆及多士，非常豐富。

墨西哥雞肉芝士薄餅 $148
墨西哥薄餅夾着免治雞肉、洋葱、墨西哥辣椒醬及芝士來焗，配以酸忌廉、番茄莎莎及牛油果醬來吃，好惹味，又無一般小食咁熱氣。

辣水牛雞翼配藍芝士醬 $98
雞翼以喼汁、檸檬、醋、辣椒等自製辣醬來煮，辣勁頗強，配以用 Stilton 藍芝士、酸忌廉調成的沙律醬，酸辣過癮。

墨西哥玉米片配辣肉醬、芝士、墨西哥辣椒 $128
Nachos上鋪滿用牛肉、紅腰豆、墨西哥辣椒自製的辣肉醬，加上車打芝士、水牛芝士、番茄莎莎及牛油果醬，辣辣地，香口又惹味。

Kunnstmann Miel $89
這款來自智利的啤酒，帶香濃的蜜糖甜香，非常易入口，女士都會鍾意。

雙城吧 Dickens Bar
地址：銅鑼灣告士打道 281 號怡東酒店地庫
電話：2837 6782

64場賽事足本播 - Champs Bar 蒲點美式酒吧

當世界盃場場都在半夜至早晨播，不少重頭戲如西班牙對荷蘭、巴西對墨西哥更是在凌晨三四點才開波，因牽涉人力物力，不是間間酒吧餐廳都願意開到咁夜直播賽事，灣仔的 Champs Bar 卻竟然足本現場播放 64 場賽事，無論你捧邊一隊都唔使擔心無得睇，絕對是球迷的一大喜訊！

酒吧一向跟香港利物浦球迷會合作，不時已經搞包場睇波，牆上亦掛滿利記球衣、球會海報等，睇波氣氛一流，最正是店內設有 3 個大型投射熒幕及 9 部 LCD/Plasma 電視，真正行到邊都可捕捉每一個精采緊張時刻。直播賽事期間，大廚特別炮製了 8 款代表不同國家的小食，連菜名都好搞鬼，如球王比利串 （燒菠蘿牛肉串）、朴智星手卷（韓式泡菜豬肉手卷）、中田英壽（燒雞泡魚乾）等，全部即叫即製，最啱佐啤酒一流。

於世界盃期間，更特別於 facebook 舉辦「兢猜 2014 年 FIFA 世界盃問答題」遊戲，參加者有機會贏取 2014 世界盃國家隊紀念版迷你足球、$500 Champs Bar 飲食券等。

燒雞泡魚乾 $68
日本雞泡魚乾塗上蜜糖以慢火焗香，配以自家製沙律醬，佐酒之選。

韓式泡菜豬柳手卷 $78
墨西哥薄餅包着泡菜豬腩片，食落酸酸辣辣好惹味。

法式美酒蘑菇煮田螺 $68
田螺用白酒、乾葱、牛油來煮，一上桌已香噴噴，伴以法包，連汁都吃過一滴不留。

燒菠籮牛肉串 $78
美國西冷切塊，以雜菜、芥末、紅酒等醃過，連蜜餞菠蘿來燒，肉味頗濃，跟菠蘿的果香很夾。

蒲點美式酒吧 Champs bar
地址：灣仔灣仔道 209-219 號利景酒店地庫
電話：2833 9086

(原文摘自《U Magzine》、文：Winsome、winnie、圖：Ken、Sky、May、Jay)

更多世界盃餐飲情報：世界盃 特集