臨近節日，朱古力亦爭相推出新款，今年朱古力界似乎都想推陳出新，走創意路線，設計獨特、玩味十足的朱古力，成功吸引到一眾貪新鮮、追新嘢的朋友！
超扮嘢！土豪金磚！
超豪氣地用上日本石川精製的食用金箔鋪滿全粒朱古力表面，做成閃爍耀眼的光芒，如真金般彌足珍貴。這顆「金磚」，其實是粒 80% 軟心黑朱古力，來自 Figure 王 Eric So新開的朱古力店 element de chocolat 。話晒係創作人，他的設計自然有諗頭，所有朱古力的外型口味全由 Eric 及兩位拍檔一手包辦，經他設計，不玩花款造型，粒粒朱古力都清一色做成立方體，簡潔卻又五彩繽紛，平淡中略帶幾分潮味。
Élément de Chocolat
地址：觀塘 apm LG 層一田超市內
電話：3464 0953
營業時間：10am-10pm
偽魚子醬？
朱古力只要稍加包裝即可變上品！像眼前這款「Chocaviar」般，聽個名就知，是 Chocolate＋Caviar 的意思，由意大利百年品牌Venchi 推出，做成 2mm 幼粒般的黑朱古力滿滿地放在扁身的玻璃瓶內，以金屬貼包裹，賣相幾何亂真，如同魚子醬般珍貴。但別少看它細細粒得個樣，其實每一粒都滿載層次，所有朱古力全由純南美可可豆及 75% 可可粉以人手製成，每一粒做得細如魚子醬，外層是帶點焦香的 Forastero 可可香，中層是矜貴 Criollo 的獨特果味，最後更嘗到 Trinitario 的苦澀，一粒嘗盡可可特性，難怪這款產品曾於意大利榮獲 Vassoio D'Oro Award 獎項。
最佳的品嘗方法，是如同吃 caviar 般，用小匙舀一口，讓朱古力在口中慢慢溶化，吃時不妨配以香檳，讓純厚的朱古力散發出濃厚的回甘味，層次豐富得可媲美正版魚子醬！
Venchi Chocolate
地址：中環士丹利街地下 21 號舖
電話：2868 0336
營業時間：星期一至六 8:30am-9pm、星期日及公眾假期 10am-8pm
搞鬼！茶點鮑魚撻！
面前有一籠鮑魚撻，當然唔執輸食埋一份，點知咬一口，原來不是鮑魚，是朱古力？做得咁像真，全靠帝京酒店行政餅廚 Chef Roy 買來鮑魚倒模，再將牛奶朱古力唧入模具內凝固，因此「朱古力鮑魚」周邊的紋理與真鮑魚一模一樣，還細心到用光亮的伯爵茶者喱做芡汁，成功騙到所有人，好搞鬼！以為呢類朱古力，十成十都係好睇唔好食，但驚喜在味道確實唔差，而且朱古力內更有流質的爆炸糖奶黃餡，味道不再單一，配搭嶄新到極點！
食到底，還有撻皮，以為都係朱古力？又錯啦，原來是一個真正的曲奇撻底，食落還帶點牛油香的酥化，完全估佢唔到，是朱古力，還是鮑魚撻？法印又要講：「真係好難捉摸呀！」
帝京餅店
地址：九龍太子道西 193 號帝京酒店 1 樓
電話：2622 6256
營業時間：10am-10pm
無得輸！走得意玩野風！
以假亂真的食物讓人賞心悅目，最受一眾少女們的歡迎。而The Chocolate Room最近更大推朱古力的創意甜品，風摩萬千少女，包括有外表似沙丁魚罐魚，實情係朱古力。另有外表似長法包，實情又係朱古力。入到店舖內，確實令人疑惑，真真？假假？買之前都係問清楚店員姐姐先啦！
The Chocolate Room
地址：馬鞍山新港城 2040 號舖
電話：2755 6966
營業時間：10am-10pm
麵粉棍 Log Cake！
大變新！COCO 的行政餅廚 Jean-Marc Gaucher 懂得變通，大膽地將樹幹變做同樣橢圓形的麵粉棍，而且不再做成傳統 log cake 的蛋卷狀，入面的用料重新配搭，用上 3 款單一產地的 Valrhona 可可豆炮製，最底層是質感較 rich 和 smooth 的朱古力海綿蛋糕，然後擠上用牛奶和64%黑朱古力製成的軟滑忌廉，並加點脆脆的朱古力威化，以64%黑朱古力慕絲包裹住，表面卻將白朱古力作 coating，更有層次感。這個蛋糕特別在表面的壓花朱古力片，朱古力上原來印有一大堆的刀叉匙圖案，靈感來自餐廳飯後待清洗的餐具，超有諗頭！兩邊的棍柄也是朱古力？對，是由焦糖白朱古力倒模而成，表面更帶點亮滑感，唔講真係唔知食得。
COCO
地址：尖沙咀彌敦道 118 號 The Mira Hong Kong 地下大堂
電話：2315 5566
營業時間：7:30am-8pm
收費：現金及信用卡，不設加一
交通：港鐵尖沙咀站 B1 出口
最好玩！爆炸糖蛋糕！
賣相平平無奇的蛋糕，內裏竟有細細個最愛吃的爆．炸．糖？這款嶄新的配搭，由 JW Marriott 的行政糕餅總廚 Ryan Zimmer 設計，厚實的朱古力慕絲，用上意大利名牌 Amedei 的 62% 黑朱古力製成，濃得化不開，中心混入適量的爆炸糖，每吃一啖，口中都有微妙的爆炸力，為蛋糕帶來前所未有的口感！當然蛋糕也不一味是單調的慕絲，更調校帶鹹味的焦糖醬做夾心增加甜度層次，並以朱古力蛋糕墊底，一口氣將三者同時吃下，是今期最過癮的朱古力蛋糕！
Dolce 88
地址：金鐘金鐘道 88 號太古廣場香港 JW 萬豪酒店大堂
電話：2810 8366
營業時間：7am-9pm
收費：現金及信用卡，不設加一
交通︰港鐵金鐘站 F 出口
