耶耶!你哋好衰㗎!人哋唔係講緊靚仔呀,我講嗰啲「靚仔」係法國生蠔之嘛,我.......2014食蠔第一擊,梗係要同大家分享吓。
大家有無留意呢?咁大張枱,又點咗咁多嘢食,我梗係唔係生大食癪啦!我...我...等人呀!嘻嘻,我等 Bosco,嗰果好大隻、好靚仔嗰個 Bosco 呀,男神黃宗澤呀!佢係呢度老闆,憑我做咗咁多年女生嘅經驗,嚟呢度所有女仔都有昅生蠔同 Bosco 靚仔嘅嫌疑,我連熒幕初吻都送咗畀佢囉,愛意又點需要收收埋埋,明等佢又點話。
觀賞靚嘢係女士嘅天性,未等到男神之前,都要醫下肚㗎,點幾隻大大隻又靚仔嘅法國蠔食下先,而家係歐洲蠔季,而且仲係最當造嘅時段,唔點幾隻浸過歐洲鹹水嘅嚟品賞吓,咪好蝕底?係人都知道法蘭西靚仔最 charm 㗎啦,成個餐牌成半打有多嘅法國「靚仔」,Mermaid、Huître Creuses、La Masion、L'émeraude、Majectic、Gillardeau、Lambert,使有 Ostra Regal,上枱嗰陣,用隻叉仔篤下佢哋嘅裙邊仔,仲郁㗎,幾鬼新鮮,味道仲超 fresh,真係食足半打都唔夠。
不過,我知呢度熟食同刺生都好正,要忍住先。我要激讚呢度嗰藍青口,真係用法國 Baby Blue 㗎,煮好無渣又無澀味,配超超超濃嘅藍芝士汁,食吓食吓,一個女仔都可以 K.O. 成煲;個豬腩肉先衰,明明係用西班牙豬仔炭燒㗎嘛,無嗱嗱豬腩變韓系型男,叫人用生葉包住酸椰菜、大葉、墨西哥 BBQ 醬咁食,肥嘟嘟又鬆化,真係秀色可餐。
哎唷!食咗三道菜,Bosco 一定仲有通告未嚟得嘞,等我叫埋呢度嘅日本刺身先,Bosco BB 話平時啲西式凍海鮮根本唔夠鮮,都不如日日返日本靚魚、靚貝賣刺身好過,咁識食嘅男人係咪嗒得杯落先?Bosco,唔使怕我多猛男埋身㗎,我食住慢慢等你吓。
OysterMine
地址:九龍城南角道 57 號地舖
電話:2382 8234
營業時間:5pm - 2am
(原文摘自《U Magazine》ISSUE 475、文:小儀、圖:Nova)