上星期我咪去咗手瓜起月展嘅大隻佬，順道行下旺角，就發現呢間新嘅甜品舖。Pheromone 呢個字好深，我撐大對眼再睇清楚，係「費洛蒙」呀！「費洛蒙」喎？「費洛蒙」喎？大家唔可以唔識㗎，呢樣係人類自古以來追尋㗎，個個人類都好想得到嘅嘢。「費洛蒙」咪就係我哋戀愛時發出嘅開心激素，傳說話食甜品都會令身體產生呢種激素，嘩！呢間舖個老闆都好浪漫唧，食完細蓉一於拜會下。
原來舖頭係由奮進青年 Perty 開設，佢喺唔少本地甜品舖都工作過，一路儲經驗一路儲錢，舊年年尾終於夢想達成開咗呢間咁 fancy 嘅甜品店，堂堂大男人咁浪漫，都係因為甜品係佢心頭愛，一落手整就激出發「費洛蒙」。他 15 歲就入行，喺甜牙牙、五代同糖同松記都做過，做咗咁多年都係咁鍾意，「費洛蒙」指數從來未下跌過，所以就一路做囉！
睇下我前面嗰杯「棉花堡」就係佢創作出嚟，成個水晶球咁大嘅棉花糖，睇下都開心，舖頭幾乎個個少女都叫畀部相機食先，自己把嘴緊隨其後，Perty 肯定有處女座的奄尖性格，留意下粉紅色嘅棉花糖，嗰粉紅好實淨，原來係佢嫌啲現成加色素糖粒又甜顏色又淡，於是自己用原色糖粒加色膏混出嚟，嗰棉花水晶球先咁靚女咋。少艾們最愛的「馬加窿」都唔下色素，佢為人真係好鬼細緻嘅呢！
佢仲好有諗頭，用咗啲自製班戟皮切到似扁意粉咁粗，配忌廉、朱古力醬同 Oreo 做「撈麵」﹐連埋即叫即整嘅窩夫、梳乎厘、木糠布甸、雪花冰、法式班戟、雪糕芭菲同蜜糖吐司等，甜品選擇真係揀到人眼花瞭亂心到亂埋。
Pheromone Dessert
地址：旺角白布街藝興大廈 8 號地舖
電話：3998 3412
營業時間：3pm - 1am
(原文摘自《U Magazine》ISSUE 484、文：小儀、圖：Nova)
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
