今個星期，我就喺尖沙咀一幢商廈搵到一間 gimmick 十足嘅，款款到吸引到我哋呢啲貪靚人士眼球，枱面先係其中一部分咋，搞到我當日嘅「長期性選擇困難症」攞我命咁劑，所以我要報仇，寫晒佢哋出嚟。
呢度啲甜品同嘢食真係畀個師傅玩轉晒，噴晒煙嘅 tiramisu、之前出過用日本素麵再加肉醬、芝士、番茄扮 pizza 餡「偽 pizza」，最堅揪係餐牌上仲有幾款成枝汽水反轉再反轉嘅「鐡塔」系飲品，飲杯嘢都周星星上身，莫非呢個世界真係 Magic 一秒間，千祈咪眨眼。
麻呢麻呢哄...變出呢種魔法嘅朋友，就係店主跟主廚 Stanley 嘞，真係飲食界年輕才俊，30 歲未夠就喺 Grand Hyatt、香格里拉等大酒店做過餅廚，仲好有心，自費去咗法國同日本造詣技藝，加埋死慳死抵，就畀佢開咗呢間甜品 cafe。
Stanley 嘅殺手鐧係枱面左上角嗰嚿雲，大家睩大對眼睇真啲，大大嚿綿花糖下面係白酒桃玫瑰慕絲，綿花糖下面先係寶藏，因為係用咗法國做法，用白酒做 jelly 再放法國白桃，上面仲有海綿蛋糕同玫瑰 cream，做法好高級唧，我見呢度十個女仔，十個都叫，於是我即刻潮跟！Tiramisu 大家都唔好放過，上枱時噴晒煙仙境咁，原來除咗視覺效果，仲可以令 Tiramisu 底層慢慢凝固變硬，食落同平時嗰啲唔同㗎。
嚟呢度，最好就係甜品食到咁上下，又可以叫翻 round 小食、pasta、三文治，嗰南瓜飯絕對唔錯，真係有南瓜嘅清甜又 creamy，都幾飽飽㗎。不過人生總有幾個大食朋友同行，主食甜品可以喺一餐內不斷循環再食，作為伴食嘅我們帶佢嚟就最啱！
White Button Cafe & Dessert
地址：尖沙咀亞士厘道 23 號雅士利中心 12 樓
電話：2372 9998
營業時間：12nn -10pm
