Q︰究竟中村藤吉有幾勁？
A︰其本店早於百幾年前（1854年）已經在京都成立，現時在日本共有 5 間分店，歷史超悠久，在當地名氣響噹噹，基本上已成為京都的旅遊點，人人都爭相拜訪這間抹茶界的明星。它的出品傳承日本人的堅持，茶葉選擇好講究，分有不同種類的茶，像清爽順和的「煎茶」、圓潤甘甜的「玉露」、經 7 種茶混合而成的「中村茶」等，連抹茶也有薄茶和濃茶之分，難怪成為日本天皇的貢品。
Q︰香港店似唔似京都店？
A︰香港店為了營造日本的全體驗，枱凳、布簾、彩色枱墊統統在日本訂制，設計簡約舒服，十足本店的茶室風格，仲專程從總店派來 6 位店員駐場。香港店員事前亦到本店受訓兩星期，把日本的服務、氣氛直送香港。唔同嘅係香港店設於 The One 18 樓，兩邊有落地玻璃窗，居高臨下望住住個開揚維港景，比總店仲醒神！最 eye catching 是店內的特大榻榻米，放了一把和傘，增添優雅感。
Q︰第一次來，有咩必食？
A︰對於香港人來說，最吸引一定是抹茶甜品！品牌勇於創新，多年前已推出茶味甜品，03 年更自家研發生「茶啫喱」，以抹茶做成果凍，口感好滑，是店子的必食名物！「丸十芭菲」有齊軟雪糕、果凍、紅豆蓉、脆米、蛋糕於一身的芭菲，承在高杯中，層次分明好漂亮，分抹茶及焙茶兩款，呃 like 最掂！香港獨家的有「抹茶大福紅豆湯」，香甜的紅豆蓉以甘濃的抹茶煮開，配抹茶大福，一甘一甜，perfect match！
Q︰有無其他推介？
A︰店內也供應鹹食，像「腐皮抹茶烏冬定食」，自家製抹茶烏冬再加上豆香濃的日本腐皮、京都長蔥、熊本產白飯和抹茶果凍做甜品，一個set 就能滿足心靈與脾胃。個人認為必試全店最貴 ($198) 杯的「別製初昔抹茶」，茶葉以石製茶臼碾磨成細粉，沖泡起來色澤鮮綠，濃稠得帶點杰身，每日仲只限量 5 杯，die hard 抹茶控點都要豪一次！手信區仲有茶葉、年輪蛋糕、朱古力及曲奇等可買走。
Q︰除了堂食堂飲，仲有咩搞作？
A︰佢地每月會有幾天舉辦沏茶班，由日本遠道而來的茶師著晒和服教授泡抹茶技巧，邊品茶邊吃和果子，仲要只需 $50 便可體驗到，不可不試！
Q︰咪住，有無得訂位？
A︰Sorry，店子不設訂位，要食就要親身去排隊，好在店子都好體恤大家，排隊飛上印有 QR code，只要嘟一嘟，就知幾時輪到自己，在商場邊 shopping 邊等，唔使排餐死。最後提下大家，15/ 5 第一天開 11am-5pm (所以唔好諗住放工試！) 不過，16/5 就已經開 11am-10pm (最後點餐 9:15pm)，要留意是每枱限時 90 分鐘，並必須惠顧一份飲品或食物。
中村藤吉
地址︰尖沙咀彌敦道 100 號 THE ONE 18 樓
電話︰2426 6111
營業時間︰11am–10pm (除 15/5 開業第一天)
收費：現金及信用卡，不設加一
備註：茶芥每位 $10，每人限時 90 分鐘並必須惠顧一份飲品或食物。
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
