故事係咁嘅，大家每個星期日喺公仔箱度都見到我啦，啱啱舌戰到新加坡，點會無食海南雞、肉骨茶之類？話說有日返香港，突然間任性想食吓星馬嘢，咁我就梗係即時撥個輪 call 飯啦。我哋揀咗呢間大坑小店，同店長傾傾下，先發現世界真細小，原來這間舖曾經喺香港仔舊大街開過分店，我同屋企人都幫襯過。
等我先頭仲同朋友講，自從山窿謝記同嗰間南洋餐廳結業之後，成條大街真係無嘢好食，喺大坑搵返個舊街坊真係開心。大家都知馬拉嘢幾咁有份量，當日我都唔敢叫咁多，試吓佢哋嘅招牌嘢都唔錯。香港濕濕立立咁，第一時間點個肉骨茶先，藥材味好重但又同我喺新加坡食到嘅唔一樣，原來呢種係檳城口味，大廚係檳城人，當地嘅肉骨茶出名多藥材，佢又加咗靚當歸同新加坡醬油，所以烏卒卒咁，最開心飲落無我喺新加坡食嗰個咁油，原來大廚唔加肥腩肉製，湯頭好清，一啖入口熱辣辣、甘甘濃濃，原來煲咗成 6 個鐘好老火，飲完袪咁啲濕氣，嗰晚好好瞓。
除咗呢啲天氣啱食嘅肉骨茶外，佢哋仲有唔少星馬家鄉菜，好似大馬「橋底豬手」，有少少似德國豬手，不過醃料更正，皮更脆之嘛，用咗花椒、八角、洋葱、西芹、白葉及胡椒等香料入味，用刀切直頭發出嚓嚓聲，嗰日食唔晒打包返屋企，豬皮都仲脆呀。
喺呢度，唔好錯過佢哋嘅海鮮，佢哋會返啲靚嘅星馬海鮮，好似螄蚶同菲律賓魔鬼魚之類，用星馬大排檔嘅煮法處理，香口惹味，我見都幾多人叫喎。
肉骨皇
地址：大坑浣紗街 45 號浣紗花園地下 1 號舖
電話：2972 2266
營業時間：12am - 3pm、6pm - 11pm
(原文摘自《U Magazine》ISSUE 497)
