小儀：人食我又食 手工雪條

呢間舖，好時尚喎，喺對面馬路已經見到啲人坐喺窗口位，對住條街喺度又舔又啜，見到咁刺激嘅場面，即刻令我口水分泌倍數上升，個人又行到身水身汗，唔好講咁多，即刻叫枝食下先。

咦！好鬼衰呀！成櫃都係雪條，你叫人點揀先？未食，我呢啲咁著重外表嘅，已經被佢咁靚嘅雪條勾咗個魂魄，大家睇下，士多啤梨、菠蘿、奇異果味，真係有好大好大好大粒士多啤梨、菠蘿同奇異果喺度，好吸引。嘩嘩嘩！仲有枝伯爵茶配開心果，我飛佛呀；仲有坊間好少見嘅豆腐味，鬼馬呀，會撒黃糖上面，咪真係好似食豆腐花囉？咁搞法，我真係葉問上身，大叫：「我要食一打。」先得。

唔．．．凍到牙到痺！但真係好正，伯爵茶正正正，茶味好香，仲有唔少開心果；豆腐味我都好愛，啲豆味超濃又唔甜，正呀；至於生果味，我最愛菠蘿，食落啖啖果肉，好似我哋細個食啲雪條咁，但係係味道放大版，濃甜到好似飲濃縮菠蘿汁咁。老闆娘 Candice 話佢因為有食物敏感，己所不欲，呢度啲雪條都唔加化學品，用嘅係天然果汁同北海道 3.6 奶，要超足料先做到咁濃郁嘅生果味，所以成本都唔平，佢仲會不時 pop up 啲新口味，嗰日 Candice 就請咗我吃非常有實驗性嘅牛油果 x 煉奶味雪條，令人月月有期待。

但真係要投訴下，啲雪條好墜手、好大枝、好鬼「襟食」，要快快趣、密密口食呀。不過，其實阿老闆娘都好細心咁，畀個紙杯你兜住，唔好食到一身都係，杯上仲會寫上你個名，唔怕影多幾張 selfie 後同啲friend嘅雪條大兜亂。

iSEE iSEE Handcrafted Icy Desserts
地址：銅鑼灣禮頓道 138 號希雲大廈 01 號舖
電話：2337 3361
營業時間：
星期日至四 11:30am-10:30pm
星期五、六及公眾假期 11:30am-11:30pm

想睇更多？即上 甜品 / 銅鑼灣 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！