幻象甜品騙局

最Hit食訊

發佈: 2015.09.10

文:

仲有扮到成個七夕星空咁夢幻嘅和菓子，甚至真真正正「扮晒蟹」嘅蛋糕都有，騙徒相當高明，哎唷唷！幻象 or 現實‧‧‧‧‧‧我真係好亂呀～

金槍不倒固態啤酒
前排 YouTube 最紅，咪就係日本人妻頻道 ochikeron 教人自製啤酒樣嘅啫喱，今次東瀛失威啦，因為呢杯咁像真嘅啫喱，香港一早有了。老老豆豆，一個不留神真係會畀呢杯啤酒呃鬼咗，睇下佢泡沫豐盈，真係連 Stella Artois 啲泡都無咁完美，最爆係它金槍不倒，傾斜 90 度都永無側漏，因為唔係液態，係貨真價實嘅啫喱嚟。

啤酒部分用蘋果汁做，顏色似到生啤十足十，口感實實淨，味道則似 apple cider，不過 0% 酒精，3 歲細路都食得；講到最神似係頂層泡沫，原來這部分以蘋果汁加果凍粉做，製作期間不斷攪拌令液體起泡再冷藏，舀起時，軟綿綿嘅感覺似吃棉花糖，扮嘢過扮嘢秋，唔係唔 like 呀？

啤酒啫喱 $28 杯（紅丸）
蘋果味都幾濃郁，酸甜醒胃，泡沫部分像棉花糖，整體甜美，食落過癮。

紅丸甜品
地址：鰂魚涌英皇道 901 號英麗閣 D 座地下 B1 號舖
電話：2601 9201
營業時間：星期一至五 12nn-11pm，星期六及公眾假期 1:30pm-11pm，星期日休息

京都瘋賣星空菓子
呢款來自京都嘅「星づく夜」，日台網友傳得瘋狂，我唔係吹水，google「星づく夜」，會出現 380,000 個結果，圖片都有 95,600 張，隔住個 mon 都感受到佢嘅靚，網民瘋傳是常識吧。由於它是每年夏季限量版本，連一向冷靜嘅日本人都有盲搶情況，數量及販賣期有限，基本上每天開賣，不用 1 小時已賣光光了。

鬼火咁靚嘅羊羮大有來頭，由 1685 年開業的京都和菓子老店「龜屋清永」製，這老舖的傳統是四季都會推出限定版和菓子，而這款是 2015 年夏の限定，以夏日星空為概念，極夢幻，靚到日本人形容為「綺麗得吃掉也是一種浪費」。

這菓子由香港代購 Bomis 引入，店主 7 月下旬親身往京都採購，要取得這菓子不易，他跑勻京都 3 個零售點都售罄，超無奈，要親身跑去祗園老店花 2 星期訂造一批才有貨。由於是期間限定的，8 月下旬是這菓子的訂製的最後限期，店主剛剛跑到京都預訂最後一批，貨物會 9 月中抵港，有訂快手，應該趕得切中秋賞月時品嘗。

「星づく夜」菓子 $150 大（270g）、$100 小（160g）上層透明的是寒天，藍色部分是百香果與檸檬味羊羮，新月與星星分別是羊羮及淡雪羮，仲有金箔扮滿天繁星，食落有甜甜蜂蜜味，質地似史密夫軟糖，實淨但唔黐牙。

Bomis 日本代購．集運
網址：www.facebook.com/bomis.sl
電話：6615 1539（WhatsApp only）
備註：1.即日接受預訂，數量約 300 件，大小各半，貨物約會在 9 月中到港，可透過 fb inbox 或 WhatsApp 查詢及預訂。2. 可於門市、平郵（約 $12 起）或順豐速遞（每份約 $22 起）交收

拆白黨漢堡王
糖鈕漢堡 $108（小糖鈕）
呢個拆白黨芝士漢堡，出自前文華及半島酒店餅廚 James 及 Ronald 之手，漢堡包是包了牛油酥皮面的泡芙，最似嘅芝士其實係益力多啫喱、漢堡扒就用 70% Weiss 加忌廉及蛋黃做嘅朱古力軟心 Ganache，下面仲有燒菠蘿。最搞鬼係師傅用咗百力滋的 recipe 做餅乾條扮薯條；slow cook 的燉蛋加桑子汁扮茄汁伴碟，好一個蠱惑的漢堡。

小糖鈕
地址：元朗裕榮徑 11 號好旺洋樓地下 10 號舖 (舊 B仔涼粉直入)
電話：9704 0000
營業時間：星期二至五 4:30pm-11pm，星期六日及公眾假期 3pm-1am，逢星期一休息

偽裝吉列豚
紫 $68（Fairy Tale）
做乜甜品咁鍾意扮鹹食，呢款就扮鐵板吉列豚，不過上面有球紫色雪糕、旁邊有日本番薯仔，醒目的我一眼睇穿它是好假的肥仔。吉列部分無作假，不過裏面唔係豬肉係紫番薯餅，番薯泥仲有粒粒栗子增加口感，紫薯餅、番薯仔連鐵鍋入爐焗，上枱時放上日本紫薯雪糕及吉士汁，假得嚟好甜美。

Fairy Tale
地址：大埔仁興街 2 號地舖
電話：2653 0123
營業時間：星期二至四 12:30pm-11pm，星期五 12:30pm-12mn，星期六 11am-12mn，星期日 11am-11pm，星期一休息
備註：甜品於 1:30pm 後供應，不設訂座

甜嘅？紅酒牛尾
Oxtail 單點 $98、連飲品套餐 $108（Doux）
真係激似紅酒燴牛尾，甜品師 Keith 佢呃人，以 70% Valhrona 朱古力及胡桃做 Brownie 扮牛尾，中間仲放咗 panna cotta 扮牛骨髓，最抵死係用西西里血橙加八角煮成「偽紅酒汁」，仲自家製的番茄 jam 同忌廉芝士加乳酪做的雪糕扮蒜頭，配埋糖餞嘅甘筍，視覺上堅似，入口有濃濃香辛味與朱古力味又好夾喎。

DOUX
地址：旺角彌敦道 726 號 18 樓全層
電話：2808 2520
營業時間：1pm-6:30pm、7:30pm-12mn，星期二休息

扮晒蟹粥紅芋蛋糕
生滾蟹肉粥鬼馬蛋糕 $330（帝京餅店）
蟹季到咗，連蛋糕都乘機抽下水，蛋糕充蟹粥。那隻張牙舞爪嘅紅蟹，真身係白朱古力，噴咗層橙谷古油嚟偽裝成紅蟹，裏面無肉無膏，但卻有沖繩紅芋忌廉及爆爆珠扮蟹子；為咗扮到似粥，蛋糕面有一層意大利米布甸、仲加埋血橙啫喱扮煮熟了的蟹膏，「粥底」則由沖繩紅芋及混入金栗碎的法國忌廉及海綿蛋糕相間，連沙煲上，抽水抽得好成功。

帝京餅店
地址：旺角太子道西 193 號帝京酒店大堂
電話：2622 6256
營業時間：10am-10pm
備註：須 3 日前預訂

蛋糕扮植物押花
Flourish mini $42 件（Vive Cake）
而家少女界好興植物押花飾物，估唔到蛋糕都可以整到好似押花裝飾咁靚，糕餅師 Vivien 就用咗食用花做呢個咁靚靚嘅蛋糕，口味是枝荔枝及白桃口味，上層的透明果凍內藏漂亮的食用花，賣相同口味都清新。除了迷你版，仲有 whole cake 供應。

Vive cake boutique
地址：淺水灣海灘道 28 號 The Pulse 202 A 舖
電話：5226 1618（WhatsApp only）
營業時間：12:30pm-9pm