我要利申先，今次我係第二次寫 Elephant Grounds，讀者大人呀！唔好噓我呀！我有好充份嘅理由，第一次介紹佢哋喺歌賦街間店中店，係細細間嘅 coffee corner，不過而家間舖變大咗、內容升級咗，若果我私藏好嘢，點對得住大家嘅支持。
既然第二次寫，Elephant Grounds 嘅招牌咖啡同 ice cream sandwiches 我唔講啦，好味味自己煙燻嘅 smoked affogato 仲起度，反而要講下有咩地方升咗級，黃竹坑店叫 Coffee + Kitchen，面積有成 10,000 呎，門口有垂直植物牆，全店又用咗木做主調，真係好似去咗森林咁 relax，好鬼遠離煩囂，又有梳化位、又有 common table 喎，唔似巿區啲人氣 cafe 咁迫狹，下晝帶部 ipad 蛇上嚟，不知不覺會坐到無晒腰骨，幾鬼好 hea。
不過最正，係呢度有個超級廚房，邊 hea 邊吃係人生宗旨，有沙律、湯、飯麵、炸雞等，經常轉款。菜式由日籍大廚日設計，唔係 cafe 嗰啲 hea hea 凱撒沙律、肉醬意粉，反而有中環級數嘅 hipster 美食，好似之前做過嘅超厚吉列豬扒三文治、手撕豬肉三文治八同蜜瓜包雪糕三文治，仲有因為太「大人氣」而長駐餐牌、混合韓國美國特色嘅炸雞，加咗而家啲好潮嘅 super super food 羽衣甘藍（kale）做嘅沙律，每日款式雖然唔多，但鑊鑊有新意，嚟多幾次都唔會 repeat menu。
幫襯當日，我仲知銅鑼灣店都開咗，收後晏喎，咦！咁以後喺百德新街掃貨之後，夜啲都可以吃到肥妹必吃嘅 ice cream sandwiches 囉。
Elephant Grounds Coffee + Kitchen
地址：黃竹坑業發街 1 號 The Factory 1 樓
電話：2562 9000
營業時間：星期一至五 9am - 6pm，星期六日休息
歡迎你 like 我哋 U Food Facebook Page / U Food Instagram ，取得我哋更新更快嘅資訊！
