粗切蘿蔔 油糍
用上傳統做法，粉漿加上超級豐富的餡料，蘿蔔粗切，加上西芹等材料，餡已佔蘿蔔餅 6、7 成，師傅火喉拿捏得好，沒有炸過櫳，每段時間小量製作，有柯打時再放油鑊翻炸加熱，吃來唔會油立立，因為蘿蔔容易出水，油糍要即叫即吃先夠脆夠多蘿蔔汁。
蘿蔔餅 $10 件
粉漿不厚，裏面是蘿蔔絲多過粉，蘿蔔絲炸得透，濕潤但唔會水汪汪，也無渣，蘿蔔汁超甜分明，咬下去外層超脆，加豆瓣醬及甜醬吃。
西灣河人氣 煎釀八寶
煎炸小食 $12 四件
珍香園的煎釀小食，在區內賣到街知巷聞，原因是他們的鯪魚肉及釀豆腐真係無得輸，舖頭以荳品起家，豆腐都是自家製的，富豆香又實淨唔鬆散，魚肉則是舖內師傅自家打，鯪魚肉唔會放到超厚超多，但魚味超濃，因為滲粉少，彈性高又實淨，有傳統的釀辣椒、釀青椒、炸鯪魚球、炸豆腐、釀雲吞、釀荔芋、釀茄子及釀紅腸。
珍香園
地址：西灣河成安街 12 號地下
電話：2560 4592
營業時間：7am-8pm、每月首星期一休息
手攪三百回 生菜魚肉
牛下著名車仔麵檔，除了車仔麵聞名，生菜魚肉也做到香港 no.1，因為再無小食店會像老闆娘文太般真係用手攪成蓉，文太天天用新魚魚肉，用手攪成實淨幼滑的魚茸，有圖有真相，睇下魚肉的質地，唔塌唔會輕飄飄，實淨潔白，仲跟返傳統裏面仲有蝦米同果皮，灼好後果皮香氣飄晒出嚟，非常有古早味，以前在牛下已賣到日日見人龍。
生菜魚肉 $15
以新鮮鯪魚肉刴碎，再用手攪足 300 下來令它成茸，非常有誠意地加了蝦米與果皮灼熟，配以豬骨及大地魚做的湯底，爽口有魚味。
文記傳統車仔麵茶餐廳
地址：九龍灣牛頭角道 55 號利基大廈地下 G 舖
電話：2707 0082
營業時間：11am - 3am
備註：炸檔 1:30am 收爐
大過塊面 人氣炸髀
生炸雞髀 $25
肥仔鍾意食雞髀，而家快餐店雞髀奀吱吱，大隻唔過雞全翼好多，但在新界大西北，有檔宵夜熱點，有牛乸咁大嘅的炸雞髀，隻髀闊度約 5 吋，厚 1 吋，拿起好垂手，製作過程老闆話不便公開，但見雞皮炸到起晒芝麻皮咁款，有啲中式乳豬 feel，難得中心炸透，但保持肉汁，香口惹味，銷情好勁㗎。
三多(順興)小食
地址：大埔北盛街 29A 號地下
電話：6011 6423
營業時間：7pm-3am
失踪人口 經典冰糕再現
冷糕 $15
冷糕係舊式夾餅。去年油麻地碧街藥房有檔每日只出沒 2 小時嘅冷糕檔，人龍日日幾十，不過後來又消失無踪，估唔到在大埔小商場一檔雞蛋仔檔又再重臨，舖頭有專門的電爐烤冷糕，做冷糕最緊要耐性，將加咗發粉嘅蛋漿倒進模內，要等足 8-10 分鐘等冷糕澎脹發起，之後仲要等佢烘脆表面，外層脆到似餅乾，裏面軟綿綿，嘅冷糕就誕生了。
雞蛋仔專門店
地址：大埔安慈路 4 號昌運中心地下
電話：從缺
營業時間：11am - 10pm (9:30pm 截單)
相關報導：
牛下牛雜檔 再現江湖
承傳三代 榮耀米芝蓮滷味
觀塘友 集體回憶嗱喳麵
名店太子 真‧豬油渣麵
時新有對手 慢煮港式漢堡
歡迎你 like 我哋 U Food Facebook Page / U Food Instagram ，取得我哋更新更快嘅資訊！
