小儀：CHEER！爆正泰生蝦

都寫咁白囉，就知我介紹港人最冧冧豬嘅泰菜，記唔記得前幾期我介紹過 Issaya Siamese Club，呢間風格又好唔同，望落好似好傳統，實際又係幾新派喎。

高度推介，飲得落肚嘅生‧蝦‧刺‧身！唔好噓，生蝦刺身邊個港人食過？呢款，個醬係 The Hulk 咁色，仲要用 shooter 杯上喎，1‧2‧3，同我乾咗佢先講。嘩！爆辣呀，「泰」正了，完全捕捉泰國菜爆辣嘅靈魂。蝦肉好彈牙㗎，原來用新鮮海蝦，完全無坊間生蝦刺身咁又脢又腍，個 The Hulk 醬先正呀，用「泰」勁辣嘅青色指天椒、薄荷、芫茜同新鮮青檸汁、魚露做，2 杯我條脷就辣到痺咗，但暗藏清新口味，爽皮！學阿姐話齋：一杯飲過再一杯喎，有膽就嚟挑戰啦。

冧冧豬第 2 號係泰式豬手，一講呢味，大家係咪諗到係滷水豬手，咁你就諗得「泰」簡單啦，滷水浸入味係第一步咋，風乾 1 日之後再嚟去「爆炸」，整出嚟成隻德國豬手咁，但勁 juicy、又富膠質，外皮又脆，一陣我哋班飢餓蝗蟲極速食晒啦。

蝗蟲部隊裏面比較着重健康嗰位，入嚟已望實舖頭裏面冰鎮 seafood 嘅櫃，揀咗條泰國紅魚鹽燒，魚肚裏面塞咗好多泰式香草同黃薑，magic touch 係伴食嘅青檸粒，魚肉滑又有檸香，好醒胃。

不點埋甜品，真係誓不為人，呢度仲要拼盤咁上，一套有椰青糕、椰漿木薯、七彩糖不甩、糯米糕，全部都用新鮮嘅椰青、斑蘭同綠豆做，好清，無甜到牙痺，真係要「射射」廚師阿虎咁勤力，今餐實在「泰」飽飽、「泰」回味啦。

泰燒遙
地址：尖沙咀諾士佛臺 1 號 5 樓
電話：2721 9898 / 9249 9422
營業時間：3pm-1:30am

想睇更多？即上 尖沙咀 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！