呢間舖真係我 2016 的大發現，前兩三年，香港咪出現咗個拉麵潮，呢間舖就係嗰陣開業，一直未有機會去試。但點知一食就驚為天人，一試愛上。呢間舖勁囉，佢個招牌「特濃豚骨沾麵」係「關西沾麵冠軍」，冠軍嘅味道究竟係點？速試！嘩嘩嘩！不得了，重口味！沾麵湯汁肉味同鰹魚味好濃郁，不過我欣賞佢唔油膩，沾起煙韌彈牙嘅麵條食，夾過我同森美。我諗冬天食仲一流。
作為一個擁有淑女勛章嘅斯文女性，阿媽教落，食嘢要小口小口咁食，但呢個淑女王道放喺沾麵舖真係會「瀨嘢」，因為啲湯汁杰呀嘛，食得慢，啲湯就會變「瓊」姐，不過，呢度好細心，跟足日本，放個小電爐喺枱，將啲凍咗嘅湯汁放上去暖返就唔會「瓊」， 好似我呢啲出名食嘢慢過龜嘅，簡直係喜訊。
不過，今次冠軍沾麵唔能夠贏得我嘅歡心，偷咗我個心嘅反而係櫻蝦沾麵，睇下，個沾麵汁加滿櫻蝦乾㗎，仲加咗櫻蝦油，蝦味香到爆炸呀，個湯汁比冠軍麵清新啲，我勁勁勁勁勁 like 呢款，好唔捨得食完碗麵。
唔捨得食晒碗麵呢種態度就啱嘞，因為吔晒啲麵，件事係未完㗎，因為最終一滴湯汁我都要舔埋！我仲點埋芝士同白飯做「芝士雜坎」，即係芝士撈飯呀，將個湯汁放返起爐上面煮滾，加埋白飯同芝士起勢撈，沾麵所有精華都喺晒呢個阮小儀芝士雜坎裡面，堅揪正，一滴湯都唔嘥，我自己都覺得自己好有衣食喎。
名古屋撈麵 $93
特濃豚骨沾麵 $88（芝士雜坎 加 $20）
櫻蝦沾麵 $98（芝士雜坎 加 $20）
辛辣拉麵 $93
富士山 55
地址：銅鑼灣伊榮街 9 號欣榮商業大廈地下 1 號舖
電話：2363 3334
營業時間：12nn - 10pm
備註：尖沙咀南洋中心亦設分店
想睇更多？即上 銅鑼灣 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
