韓潮 食蒜頭山牛扒

韓國人原來每年食38萬噸蒜頭，Mad for Garlic 就投其所好，9 成菜式都係用蒜頭入饌。炸蒜片、炸蒜粒、炸原粒蒜頭、油浸、醋醃、焗蒜粒、原個焗蒜、生蒜粒、生蒜片、醃蒜芯同糖漬一共 11 種方法處理蒜頭，就睇下一個蒜頭你可以煮到咩花樣！

牛扒同蒜頭係最佳組合，而Mad for Garlic 嘅招牌就係 —「烤 MFG 招牌澳洲肉眼扒配蒜頭山」（$188）。呢道蒜頭牛扒用蒜最多，係韓國店三大最受歡迎菜式之一。將澳洲肉眼扒烤香後，鋪上 50 克生蒜，再以 60 克炸蒜片覆蓋成塊肉眼扒，成座巨型蒜山，賣相好搶眼。

另一招牌「蝦、菠蘿、炸蒜片 MFG 招牌意大利薄餅」（$108），個餅底係用韓國麵粉搓製。焗香後，頂層鋪滿蝦肉同菠蘿，加埋炸蒜片同巴馬臣芝士，好想book位食。除咗 pizza，意粉都有嘅，廚師推介 —「招牌蒜片墨西哥辣椒炒意粉」($88)。是的，呢道意粉得蒜片、辣椒同意粉，係好簡單，不過配搭好突顯蒜頭味，蒜頭友實鍾意！

吃至尾聲，仲有蒜頭甜點︰「自家製雲呢嗱雪糕配糖漬蒜頭及雜莓醬」（$62）同「蒜頭香蕉朱古力醬薄餅配自家製雲呢嗱雪糕」（$68），特別得很。

Mad for Garlic
地址：銅鑼灣時代廣場食通天11樓 1104 店
電話：3752 2880
營業時間：11am-11pm

文：Lou. Y

歡迎你 like 我哋 U Food Facebook Page / U Food Instagram ，取得我哋更新更快嘅資訊！