實在太令人興奮，忍唔住要叫大家去試下呢間好西。
我要講，呢間舖消費中上啦，你知我幾 like like 幫大家慳錢啦，今次都堅持介紹呢間，因為我畀佢哋嗰八爪魚拆服咗。老老竇竇，幾乎每間西班牙餐館都有烤八爪魚啦，呢度咁簡單菜式，真係好蝦師傅功夫㗎，不過十次有九次吃，都似食緊蜻蜓牌擦膠，不過大廚真係好手勢，烤出嘅八爪魚腍滑又鮮，仲真係入到辣味炭香㖭，真係食到我♥ ♥眼。
想食好嘢，最緊要唔係有錢，最緊要係要識叫。所以先來一課每日一字先，博士呀博士，嚟呢度，點叫嘢先叫到好嘢呀？咁大家要記住呢個字 Asador 啦。Asador 其實係西班牙北部傳統的烤肉菜式，呢種菜式大過你同我，有過百年歷史啦，而呢度就係專做呢樣嘢啦。
老師話：無遮無扇，神仙都難變呀，於是呢度喺西國訂咗 2 部叫 Josper 嘅炭火燒烤爐返嚟，開行佢有成 500℃，熱過地球核心，我 ♥ ♥ 嘅 octopus 就係用佢烤出嚟，個爐咁熱，都係為咗高速烤靚熟肉呀、菜呀、海鮮咁，不過又唔會扯乾水，廚師話用嚟烤傳統嘅 Arroz Caldoso 海鮮飯超正，向來對機器零感覺嘅我，突然想向爐 sa 過 lute 喎。
我仲要講，邊個話老外唔識食魚？同我企出嚟。今次我起度食到條鱸魚，就證明要排除咗西班牙人先好講呢句說話，原條鱸魚上枱已經比平日的 fillet 震撼，烤過後魚肉一樣咁滑，原來西班牙人同中國人一樣，食魚會灒油，不過呢度灒嘅係蒜香橄欖油，啲蒜超香超甜，同場 3 個人 3 張嘴就清晒隻碟啦。真心想講，好食的話，錢係值得畀嘅，呢餐唔好慳，好好對自己嘛。
The Optimist
地址：灣仔軒尼詩道239號地下至2樓
電話：2433 3324
營業時間：
（餐廳）星期日至四 12nn-2:30pm、6pm-10:30pm；星期五及六 12nn-2:30pm、6pm-11pm
（酒吧）星期一至四 11:30am-1am；星期五及六 11:30am-2am；星期日 11:30am-12mn
想睇更多？即上 灣仔 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
