講真，我差啲被呢度嘅裝修呃咗，大家有眼看啦，呢度裝修老正又平實，以為都係食傳統嘅江戶前壽司，但第一道菜上枱，我就知自己嘅直覺 200% 出錯。好爆炸囉，馬刀貝刺身下面有粒生果嘅！睇真啲，做乜奇異果好似提子咁細粒，咦！食落少少果甜味又吊起咗貝嘅鮮味；個蠔都好特別，咦！下面啲啫喱，龍珠果味嘅？夾埋一齊食，甜甜地令到超濃嘅蠔味無咁鹹，究竟我食緊嘅係咪日本料理？
你無睇錯，我無嚟錯，原來係朱師傅（圖）嘅創作（係...係我叫攝影師偷影佢做嘢）。呢位師傅先啱啱 30 出頭，在高檔壽司舖竹壽司同樂壽司出道，15 年功力，手藝一定掂，但最難得佢好鬼好學，曾跟大阪米芝蓮二星「壽司芳」嘅總廚 Hiroki 師傅共事，仲去埋本店參學，受 Hiroki 師傅嘅前衛手法影響，呢個男人將諗頭發揮到盡。
呢餐真係好正，坐喺壽司吧前，師傅突然拎枝煙燻槍出嚟席前煙燻鯖魚，我覺得我去咗吃分子料理；不過，講到最神奇嘅體驗係，係要「咪」埋雙眼感受下，個海膽下面配咗豆味十足嘅絹豆腐，咁食都係第一次，嘩！個海膽超高檔，係日本白海膽嚟，但爆正嘅位係滑溜到同豆腐幾乎同一質地，鮮甜到牙都痺呀，估唔豆味同海膽鮮味好夾，嗚嗚~~好想食多杯呀！
有人話 you are what you eat，但憑我喺食之江湖打滾多年嘅經驗，我話 you are what you cook 更準，朱師傅話佢好鐘意用最時令食材創作，我今次吃嘅，下次可能會轉咗款，不過咁仲好，好期待下回嚟，睇下你又整乜新奇嘢畀我吃！
滝壽司
地址：銅鑼灣開平道 1 號 Cubus 15 樓
電話：2782 0010
營業時間：12nn - 2:30pm、6pm - 10:30pm
備註：午市設定食，由 $228-$388（包前菜、沙律、茶碗蒸及甜品或飲品）；午市 Omakase $980 位 ；晚市 Omakase 分 $1,400 位、$1,600 位 及 $1,800 位 3 種。
想睇更多？即上 銅鑼灣 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
