慎入！榴槤雪糕格鬥！隔住個 mon 都聞到味！

最Hit食訊

發佈: 2016.07.19

文:

除咗原粒榴槤肉揸住慢慢啜之外，對所有榴槤甜品都好like。今次等我呢位榴槤控試食3間甜品店的榴槤雪糕，幫大家搵出榴槤味最濃最臭的榴槤雪糕！

1. Home's Favourite D24 榴槤軟雪糕
新加坡過江龍，主要賣曲奇為主，有招牌的榴槤、新加坡叻沙等口味外，嚟到香港仲特別設計出陳皮、龍井及桂圓紅棗味曲奇。今次特別推出香港獨有嘅榴槤雪糕，即試店主推介的「榴槤愛人雪糕新地」。

賣相：＊＊＊
個樣其實無咩特別，唔稱得上是靚仔，只見有一塊心型曲奇、曲奇碎及榴槤蓉。雪糕係白色，唔係一般見到的黃色。根據目測，只能以大大堆頭去形容。

味道：＊＊＊＊＊
雪糕顏色白雪雪，以為無料到，點知食落先知味道勁濃，榴槤味一下子湧出！店主話加咗新鮮 D24 果蓉製作，中間夾一層榴槤曲奇碎及新鮮 D24 果蓉，頂層再加榴槤曲奇碎及一大堆鮮 D24 果蓉，一次過食晒所有料，陣榴槤味真係半日都唔散！

質地：＊＊＊＊
好幼滑，感覺好 Creamy。唔會食到有冰塊或冰粒，又唔會感覺好水好稀。雪糕唔算融得太快，我影相用咗約 5-7 分鐘先食，都係見個尖頂塌咗，可以慢慢嗒真榴槤味。

價錢：＊＊＊＊
榴槤愛人雪糕新地 $55
性價比最高！新地的上、下兩層各有 3 圈榴槤雪糕，又有新鮮 D24 果蓉，大杯到可以兩個人 share！

Home's Favourite
地址：天后電氣道 96 號地下 A 舖
電話：2310 0990

2. Candy Shake 噴煙貓山王雪糕
由香港人開設的 Candy Shake 有勁多芝士嘢食！芝士撻的口味好多選擇，抹茶、紫薯、藍莓、榴槤乜都有。早排出咗貓山王榴槤雪糕，榴槤控即飛去試。

賣相：＊＊＊＊＊
杯雪糕出晒煙咁好夢幻呀！唔係個雪糕凍到出煙，而係杯底放咗乾冰搞到噴煙，視覺效果一流，忍唔住要拍片！雪糕呈深黃色，上面插咗塊朱古力牌、朱古力彩針、一粒金色的朱古力珠，再有少少朱古力醬。

味道：＊＊＊
雪糕用咗馬來西亞的貓山王製作，入口榴槤味好突出。不過隨即有陣奶味湧出，有啲搶走榴槤的味道。榴槤味與奶味兩者的味道 mix 得唔覺均勻，兩者不應該前後腳出現，要扣分。

質地：＊＊＊
有啲實淨，可能是雪得太耐，雪糕有少少硬。冰感比較重，有啲凍到結冰的感覺，唔夠幼滑。不過要讚的是雪糕唔易融，花了近 10 分鐘去拍片及影相都仲頂得住，啱晒相機食先的朋友。

價錢：＊＊＊
貓山王雪糕 $30
唔好畀外表呃咗，一杯雪糕其實有一半係啲用嚟滿足你視覺享受的乾冰，雪糕只得一球，有少少以前買奇趣杯，發現原來得 1/3 先係雪糕的失望感覺！Well，呢度仲要無奇趣玩具𠻹……(希望 90 後、00 後知道乜係奇趣杯！)

Candy Shake
地址：旺角登打士街 55 號
電話：2110 9822

3. Fruttato Gelato 味道內斂
上年 summer 開業的 Fruttato Gelato，主打低脂低糖意大利 Gelato、手工雪條、日本京都大福、膠囊軟雪糕。佢吔都有出榴槤雪糕，試吓個味夠唔夠臭先！

賣相：＊＊
平凡！淡黃色的雪糕下面放咗啫喱、士多啤梨及火龍果，無乜特別擺法，所以只可以說平凡。

味道：＊
淡黃色的雪糕用了 D24 製作，拎上手聞唔到榴槤味。食一啖，榴槤味真係好淡，再食多試真啲都係淡淡然、好內斂。講真，我仲食到有陣水味，失望！

質地：＊
唔 creamy，好似好多冰粒，雪粒一入到口即化成水咁。哎呀！食咗兩啖真係無興趣再食，sorry。

價錢：＊＊
榴槤雪糕杯裝$27、筒裝$25
睇個價位係平嘅，只可惜味道麻麻，買唔買？自己諗！