葵涌廣場二樓最近變咗做小食場，邊間最吸引，睇吓條人龍咪知囉！喺轉角位嘅「避暑山莊」，每日中午 12 點一開閘，就有人圍住等買嘢飲，唔使半個鐘小店門口就堆滿晒人，好誇張！
唔怪得啦，睇佢舖仔細細，飲品選擇多到不得了！主要分成沙冰、雪葩、梳打、茶飲及特飲 5 大類別，每款超過 20 種口味選擇，加埋會變色嘅幻飲星空沙冰系列，總共超過 100 款畀你揀！有啲用插住飲管嘅膠袋載住，有啲用大大個桶載，賣相款款出位！
八卦番，小店由 4 個 90 後年輕人開設，佢哋唔係飲食界初哥。上年青衣戲棚要排足一個鐘先買到嘅桶裝梳打，就係佢哋出品！咁受歡迎梗係心思思想開舖頭，不過呢班後生仔女唔係一味心口有個勇字咁簡單，佢哋先飛去韓國及泰國取經，周圍試飲當地至 hit 嘅飲品，試味之餘又參考個賣相，再自己研發，無論包裝和口味都好爆！
玩七彩！彩虹沙冰 $25
呢款彩虹沙冰，就是去韓國取經嘅收穫，是店內的人氣 No.1 飲品，試過一日賣出 1,000袋！沙冰分 4 層，粉紅色是石榴味、綠色是青蘋果味、藍色是甘桔荔枝味、黃色是菠蘿味，4 種咁 colourful 嘅沙冰撞埋一齊真係好吸睛（或吸 like)！
玩變色！銀河星空 $30
同屬視覺系飲品，仲有每日賣出 200 袋嘅幻飲星空沙冰系列。呢袋銀河星空有白色及藍色兩層。底層白色是荔枝檸檬味沙冰，藍色嗰層唔係色素，係泰國蝶豆花沙冰，蝶豆花遇到酸味檸檬沙冰，會變成淡紫色，好靚！
人氣！選擇恐懼症梳打 $25
當然唔少得青衣戲棚大賣嘅桶裝梳打，荔枝、檸檬、菠蘿、青檸及多款果味乳酸梳打近 30 種選擇。太多嘢揀做唔到決定，就揀「選擇恐懼症」梳打，由店員幫你話事，有時仲會係餐牌以外嘅配搭，好似呢杯紅蘋果石榴梳打，味道清爽。
真果肉！士多啤梨乳酸雪葩加小丸子 $30
小店大部分嘅果味飲品，都係用台灣製嘅果味糖漿。唯獨士多啤梨及香蕉採用新鮮果肉製作。士多啤梨乳酸雪葩果味天然，加埋自家製作嘅小丸子，口感煙煙韌韌，每日限量做到 50 份咋，要搶！
皇家泰式奶茶 $25、泰式三色冰 $25
小店連泰國飲品都有！原來其中一位負責人是泰國混血兒，向媽咪學識沖泰國奶茶。茶葉用泰國貨，奶味濃但茶味較淡。泰國三色冰以椰奶做底，加綠色黃色嘅珍多冰，用個袋盛載，好似係泰國飲一樣！
避暑山莊
地址：葵芳葵富路 7 號葵涌廣場 2 樓 2007 號舖
電話：從缺
營業時間：1pm-10am
文：Jessie、攝：Jay
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
