1.潮飲豆漿 x 果汁
石硤尾近年有幾間文青 cafe 進駐、周未又有手作市集，開始滲透點點年輕又型格嘅氣息。上個星期，於石硤尾的福田商場有間果汁店彈出。深綠色主調加英文字「Green Truck」嘅招牌，跟附近嘅小食店完全唔同 feel！果汁店由一對 80 後情侶 Jason 及 Empty 開設，兩人原本是咖啡師，一直享受好 hea 嘅偽退休生活。個幾月前，機緣巧合之下搵到呢個地舖，藏身於內街一條巷仔，周圍都是住宅又遠離大馬路，符合兩人要 hea 要 relax 嘅要求，決定開店。小店唔夠 100 呎，原本二人打算將舖頭裝修成 Food Truck 咁款，但原來成本高又好有難度，於是打消念頭。只好於門前嘅空地開 3 張枱仔畀客人坐底歎果汁。
小店嘅風格一啲都唔老套，望真啲，果汁嘅配搭仲好特別！他們將車仔麵嘅 concept 帶入果汁店中，先揀果汁嘅 base，分別有伯爵茶、豆漿、薏米水、彩菊茶及瘦瘦花茶。然後再揀蜂蜜、薄荷葉、沖繩黑糖、雪耳、迷迭香及檸檬汁等「調味料」，最後揀埋「車仔餸」，即係水果，店暫時有 19 種蔬果選擇，雖然最多只可揀 3 款，但款式足以百變！
超級六青汁 $32
嘩，一時之間唔知點揀，Jason 即時推介「超級六青汁」畀我開開胃。六青，即是苦瓜、青瓜、青椒、青蘋果、西芹及 superfood 羽衣甘藍。Jason 話必需要量清楚每種材料嘅分量，否則味道唔平衡，好似飲到蔬果的苦或草青味。
士多啤梨藍莓蜂蜜豆漿 $35
豆漿溝生果，會唔會肚痾？Empty 話就算溝橙或西瓜都唔會出事！小記無咁勇，都係揀啲正路選擇。佢話豆漿與帶酸嘅生果最夾，一於揀士多啤梨及藍莓。豆漿選用本地品牌，用咗加拿大有機黃豆製成，並特別選用低糖豆漿，以免加入生果後變得太甜。果汁帶香濃嘅黃豆味，滲出淡淡果香。其實加豆漿打成嘅果汁有啲似奶昔，質地厚且幼滑。
香蕉芒果伯爵茶薄荷葉 $33
保守派想試穩陣嘢，可以揀茶底果汁。Jason 講足 3 次話一定要試伯爵茶配香蕉芒果！伯爵茶配任何生果都好夾，芒果嘅香甜可以中和伯爵茶嘅澀，加埋香蕉令果汁質地稠身，調味嘅薄荷葉又帶來清涼嘅感覺，果然無介紹錯。
鮮果親子冰 $39
小店提供大熱嘅 Detox Water，仲幫佢起咗個名叫「老火維他命排毒鮮果水」！用不同生果配搭加果茶或花茶浸足 24 小時，每個星期都會更會水果配搭。今個星期就有芒果、藍莓等，可以舒緩眼睛疲勞，幫助美白等功效。小店會以 Detox Water 配自家製鮮果雪條，製成鮮果親子冰！食過雪條想 encore，$20 就有一條！
便便龍與鳳 $25
另有 3 款果昔，呢杯「便便龍與鳳」以火龍果及菠蘿打成，開宗明義要幫你通便便。
冰菠蘿 $10
以前學校門口總會有檔賣零食嘅車仔檔，賣冰菠蘿，但今時今日卻好難搵得返。新鮮菠蘿切片再雪到變冰，簡單但充滿回憶。
Green Trunck
地址：石硤尾偉智街 38 號福田大廈 65 號地舖
電話：從缺
營業時間：11am-9pm
2. 度身訂造 Detox Water
有得揀有得玩，梗係開心啦！但係唔少人都是選擇困難症患者，有得揀隨時令佢哋頭都大埋！於銅鑼灣開業兩個月的 Y Drink，完全明白客人有得揀嘅痛苦！
店主 Oscar 是個 80 後，訪問開始前他問可唔可以畀幾分鐘佢抖抖氣。當然得啦！抖完氣之後佢重返崗位，一邊接柯打、切生果、榨果汁，一邊做訪問，一心幾用，真係好忙。佢唔算係飲食界新人，爸爸開港式甜品店松記糖水，他都有落手落腳幫忙。不過 Oscar 打算趁年輕嘗試自己開店賣果汁，吸收多啲經營食店嘅經驗。
西瓜汁 $25/ 大
果汁店嘅選擇有果汁、沙冰及 Detox Water。果汁及沙冰有 12 款蔬果選擇，都是芒果、桃、西瓜、橙等大路款式，遲啲計劃會加苦瓜、甘筍等五六款蔬果。果汁 size 分大、細兩款，以一款水果為基礎，揀多款加 $5。但Oscar 話有得揀未必人人鐘意，好多客人睇完一輪，揀唔到隨時轉身走人！所以佢乾脆 set 好所有果汁配搭。唔搞 gimmick 就只能以真材實料取勝，好似西瓜汁就用了一大杯西瓜粒加幾粒冰打成，無水、無額外加糖，用料好足！
（左）Yellow Detox、（右）Red Detox 各$33
Detox Water 每日限量供應 20-30 杯，會有 4 款固定款式，亦可以揀梳打水、椰子水或蜂蜜水浸泡。Yellow 是菠蘿、奇異果加檸檬，可以提升體力；Red 用了西瓜、士多啤梨及火龍果，有美肌及消腫之效。
（前）Green Detox、（後）Orange Detox各$33
想免疫力提升，可以揀橙色嘅橙、芒果及西柚。飽飽滯滯兼腸胃唔好，可以試吓用密瓜、青瓜及青檸浸成嘅Green Detox。Oscar 會按客人口味或需要，度身訂造 Detox Water 嘅生果配搭。
橙奇異果沙冰 $33、椰子藍莓沙冰 $33
沙冰只有一個 size，水果佔 8 成比例，果味香濃，質地稠密唔會成杯水。
Y Drink
地址：銅鑼灣耀華街 2 號地鋪
電話：5115 7213
營業時間：星期一至五 8am-7pm，星期六、日 11am-8pm
3. 太空任務 26 款蔬果任 mix
講起旺角近期最 hit 果汁店，一定諗到要揸住架太空船去榨果汁嘅 Bana Bana！果汁店由 3 位 90 後年輕人主理。落 Order 的方法都好有趣，入到果汁店，所有人都會變成太空人，要拎隻太空船仔，再行去揀變晒做「行星」的生果。
店內有超過 26 款水果選擇，除香蕉、梨、橙、西柚等大路選擇之外，亦有苦瓜、西蘭花、紅菜頭等偏門之選，$28 可以揀 3 種生果，但有啲生果，包括士多啤梨、藍莓、芒果就要畀多 $3。每種生果都會列明卡路里含量，仲有一句簡而精的句子作介紹。
雖然好多人都鍾意自己話事，但如果你真的無心水，可以參考店內的人氣生果配搭排行榜。揀好就交去太空總部（收銀處），會有專人幫你榨咗啲行星。
唔好以為果汁店只是搞噱頭，其實 3 位年輕人都落了不少心機。他們每日收舖都會去果欄挑選生果，開箱睇過驗過先收貨，再親自推車仔運回店中。用料亦唔馬虎，提子選用日本巨峰提子、台灣手撕菠蘿等比較貴價的生果。店主又考慮到將生果預先切好備用會令水分及營養流失，所以部分生果會即叫即切，再以 1:4 的生果及冰的比例，加一安士本地蜜糖即打成沙冰。榨好的果汁會連同一張卡仔畀返你，上面寫有果汁的卡路里及營養畀你作參考，好過癮！
鮮榨果汁 $28/3 款蔬果
（左）香蕉、紅菜頭、橙，甜甜哋又飽肚少少。
（中）苦瓜、西蘭花、菠蘿，甘香清新。
（右）檸檬汁、芒果、梨，酸甜醒胃。
Bana Bana
地址：旺角染布房街 17A 地下
電話：從缺
營業時間：2pm-11pm
文：Jessie、攝：Brian、Ki
歡迎你 like 我哋 U Food Facebook Page / U Food Instagram ，取得我哋更新更快嘅資訊！
