又熱番喇！食乜好？冷麵 Please！

最Hit食訊

發佈: 2016.08.09

文:

拉麵陳 4 大拉麵店 crossover
香港嘅拉麵愛好者，無理由唔識「拉麵陳」（Meter)！早排見佢着到成棵葱咁（真係一條葱嘅造型）出現於深水埗街頭！搞乜鬼？原來係 sell 新推出嘅葱華冷麵（個名玩食字㗎，你懂的！）！

葱華冷麵 $98
夏日限定嘅冷麵除咗喺「混亂拉麵」，於 Meter 旗下另外 3 間拉麵店都食得到，包括俺之沾麵、隱家及海老名，每間店每日限量 10 碗。有乜咁特別？Meter 話呢碗麵集齊 4 間拉麵店的招牌菜於一身，好似隱家嘅麵、混亂嘅蒜及胡麻醬、俺之沾麵嘅冬菇絲及海老名嘅櫻花蝦。真係好強勁喎！用嚟盛載冷麵嘅碗仲會預先雪凍，然後再放於冰上，咁就唔會愈食愈熱，體貼到暈！

今次用葱做主題，冷麵嘅醬汁都加入咗葱嘅元素。200ml 的秘製葱華醬油，用咗蒜、京葱、薑、自家製葱油等 12 種材料調製而成。葱汁酸甜帶葱嘅清香，隨即滲出蒜頭嘅味道，別具層次。

除咗葱華醬油之外，仲可以揀選自家製嘅胡麻醬汁，或者酸酸甜甜嘅番茄醬汁。

拉麵用咗隱家自家製嘅中太麵，麵條 size 為 2mm x 2mm，每條長 30cm，較幼身並呈圓形，用福岡麵粉製成，爽彈富麵粉香。將麵條煮 5 分半鐘再沖水冷卻，麵上加少許檸檬皮。雖然分量少到連肉眼都睇唔到，但食落又感受到檸檬皮帶來嘅清新感。

配料鋪得滿滿，但主角必定是京葱！京葱不是日本貨，但 Meter 就花不少心思處理過。師傅每日去菜欄揀貨，幼嫩、咬落無渣。再將京葱以白醋醃 2 至 3 小時，味道帶酸又能夠減輕葱嘅辛辣味。

混亂拉麵
地址：深水埗欽州街 52 至 54 號平安大廈地下
電話：2708 3500
營業時間：12nn-3pm，5:30pm-9pm

橫濱米芝蓮拉麵店香港限定冷麵
拉麵迷成日投訴，喺香港人食唔到日本嘅味道，成日吊住條拉麵癮真係好慘！上個月於銅鑼灣開嘅「G 麵 7」，幕後主理人後藤將友於日本橫濱開了「G 麵 7」、「啜磨專科」及「口麵ズ」3 間拉麵店，其中「啜磨專科」更於 2015 年獲米芝蓮推介，係拉麵界嘅實力派！今個夏天，嗚門集團邀請「G 麵 7」於銅鑼灣做 3 個月期間限定店，後藤師傅仲特別炮製出香港限定嘅冷麵，鍻晒香港粉絲！

南瓜花生醬雞肉冷麵 $98
香港店獨有嘅冷麵，香甜嘅南瓜蓉配上自製洋葱黑蒜油一齊食，每條麵都掛滿晒醬汁，好惹味。夾埋白酒漬番茄及紫蘇葉，食落酸咪咪好醒胃。

巴馬火腿味噌脆冷麵 $98
今個夏天嘅新品，香港與日本店差不多同步推出！冷麵嘅配料有秋葵、白酒浸過嘅番茄、紫蘇葉及巴馬火腿。最搞鬼係加咗童星點心麵，食落有脆卜卜口感，好過癮！G 麵 7 期間限定店開到 10 月 15 日咋，想食真係要快！

「鳴門 x G 麵 7」聯乘拉麵祭
地址：銅鑼灣軒尼詩道 489 號銅鑼灣廣場一期 201 號舖
電話：2891 6800
營業時間：12nn-10:30pm

香口又清新！炸雞沙律 x 冷麵

源自日本愛媛縣的「麵鮮醬油房周月」，於 2012 年登陸香港，以沾麵和拉麵做主打，麵條每日新鮮即製，質地爽彈。以醬油為基調嘅湯底，用咗於百年木桶內經 18 個月發酵嘅特製醬油，再加入瀨戶內海產沙丁魚粉、鯖魚粉及北海道昆布，釀成後直送來港。再由香港店嘅師傅加入熬製 6 小時以上的清雞湯內，鹹香但味道清鮮。

炸雞沙律冷麵 $99
周月嘅 fans 應該記得呢個炸雞沙律冷麵，於上年夏天都見過。店家見反應不俗，趁夏天再次推出。麵條以醬菜、醋、芝麻等材料特製嘅醬汁拌勻，味道酸甜清爽。伴麵嘅日式炸雞皮脆肉嫩，唔會因為炸過火而變雞肉乾，配埋沙律菜可以減輕炸物的油膩感。想加多啲炸雞都得，畀 $45 就可以追加多 3 件炸雞！冷麵只限中環店，想食唔好去錯舖！

周月是 100% 自家製麵的拉麵店，店內特設透明的「製麵房」，以日本引入的拉麵機及麵粉製作拉麵。

周月
地址：中環歌賦街 5 號地下
電話：2850 6009
營業時間：星期一至五及公眾假期 11:30am-9pm，星期六 12nn-9pm，星期日 12nn-7pm

電影點題冷麵你愛椰菜嗎？

椰菜冷麵 $88
你有幾愛「椰菜」？今個夏天，將會上映由日本小說改篇而成的《當這地球沒有貓》。講述患上絕症的郵差與魔鬼提出「等價交換」，用世上某樣東西消失，就可以延長一日壽命。魔鬼甚至想取走與郵差相依為命的貓咪「椰菜」！

霸嗎拉麵亦推出與電影主題呼應的夏日限定「椰菜冷麵」，用拉麵店自家製作 22 號麵條，麵條比較幼身。當麵煮好之後即刻放入冰水內沖浸，令麵條即時冷卻，食落不單冰涼透心，口感更爽口彈牙。配以爽甜的椰絲、青瓜絲、燒雞扒，豐富又飽肚。