率先試食！中村藤吉抹茶月餅 + 港日同步刨冰

日本人經營嘅舖頭一向誠意十足，好似抹茶控至愛的中村藤吉，今年竟然為咗香港嘅粉絲們，首推香港獨家發售嘅月餅禮盒，日本都無得買㗎！香港人真幸福！

再幫大家重溫一下，香港限定的「丸十月餅禮盒」，有抹茶及抹茶日本甜薯兩款口味，並分有兩個裝、8 個裝及 6 個裝配中村茶。由即日起至 8 月 23 日仲有預訂優惠價㖭。店方話，兩個裝月餅禮盒已經售罄，要等 8 月 24 日返貨，用正價先買得到。

中村藤吉丸十月餅禮盒
售價：兩個裝 $198（正價）、 8 個裝 $438（預訂價）/ $498（正價）、6 個裝配中村茶 $428（預訂價）/$480（正價）

餅皮：月餅皮用咗日本麵粉製作，經烘焙後麵粉味更香！而且餅皮唔厚，食落好鬆化。餅皮嘅味道又唔會蓋過抹茶餡嘅味道，兩者嘅平衡做得好好。

內餡：月餅由日本京都製造及包裝後再空運到港，100% made in Japan！抹茶蓉餡以手採碾茶茶葉製造，即是抹茶的原材料，茶葉於沒被陽光照射的環境下種植，顏色較深。食落茶味香濃帶甘香，抹茶嘅味道於口腔 keep 住唔散！清香得來唔會因為過濃而變得苦澀，可惜都係有啲甜。

口感：抹茶餡質感幼滑，唔會有結粒嘅情況；而且濕度剛好，唔會好乾。餅皮入口唔會糊口，整體感覺不膩滯，配一杯抹茶吃，一流。

中村藤吉丸十月餅禮盒

售價：兩個裝 $198（正價）、 8 個裝 $438（預訂價）/$498（正價）、6 個裝配中村茶 $428（預訂價）/$480（正價）

味道：月餅皮同抹茶餡都係一模一樣，但呢款加咗日本甜薯肉。睇個樣，甜薯粒真係好mini；一咬，唔覺食到甜薯。再食多啖慢慢咀嚼，終於咬到甜薯粒！甜薯味即刻爆發出嚟，香甜嘅味道可以中和到抹茶嘅回甘味，啱晒怕抹茶有陣澀味嘅朋友。

港日同步 消暑宇治刨冰

抹茶宇治刨冰 $65 係尖沙咀行到爆汗，行入中村藤吉香港店 NEXT 買杯刨冰降溫吧！用咗透明膠杯盛載嘅抹茶及焙茶，清楚見到刨冰嘅唔同層次，賣相好吸引！而且方便邊走邊吃。底層先放刨冰再加抹茶或焙茶糖漿，然後再加一層刨冰，由頂吃到底都保證吃到茶味，唔會愈食愈淡。頂層放上抹茶或焙茶軟雪糕、白玉丸子及自家製紅豆蓉，大滿足！

焙茶宇治刨冰 $65 刨冰望落好似好粗粒，但入口即融，唔會凍到牙痛兼頭痛，又唔會刮損口。最讚是加咗兩次糖漿，每一啖刨冰都清甜嘅茶香。

同場加映：香港限定抹茶白朱古力餅！

手採抹茶白朱古力餅乾 $168 月餅之外，仲有香港限定產品—抹茶白朱古力餅。手採抹茶白朱古力餅乾嘅夾心餡，係將手採抹茶混合白朱古力製成。茶味溫和芳香且帶回甘，外層嘅餅好脆身。唯一要彈嘅係，餅乾有啲甜，最好一塊起兩塊止，再唔係嘅就沖定杯茶襯托吓啦。

文：Jessie、攝：Jay

歡迎你 like 我哋 U Food Facebook Page / U Food Instagram ，取得我哋更新更快嘅資訊！