睇住奧運狂食巴西燒烤

最Hit食訊

發佈: 2016.08.10

文:

食肉獸嚐盡巴西經典

大部分香港人只認識巴西燒烤，但其實巴西美食點止一種？香港逸東酒店嘅都會自助餐廳今期大玩巴西主題，推出「巴西嘉年華」，準備多款超級惹味嘅巴西燒烤串燒，包括括烤原件西冷、巴西雞胸、巴西豬頸肉、雞膇、煙豬肉腸卷、烤原個菠蘿串等，款款都做得惹味吸引。餐廳仲設水果山，有齊西瓜、菠蘿、芒果、士多啤梨、葡萄等水果，食完燒烤食生果，油膩感同罪惡感都大減！甜品都係巴西經典─傳統香蕉巧克力蛋糕、巴西炸麵團條等，不過亮點還是十幾款口味嘅 Mövenpick 雪糕！

呢個水果山非常震撼眼球，唔係唔 take 番張 selfie 呀嘛？

Metro Buffet & Grill
地址：九龍彌敦道 380 號香港逸東酒店酒店大堂
電話：2710 1091
供應日期：即日起至 8 月 31 日
時間：6pm-9:30pm
收費：星期一至四成人 $448/ 位、小童 $348/ 位，星期五至日、公眾假期及其前夕成人 $488/ 位、小童 $388/ 位，設加一

時尚靚鞋 x 巴西法式下午茶

來自巴西嘅時尚膠鞋品牌 Melissa 首次與 Maison ES 聯乘推出巴西法式下午茶，何謂巴西法式？（小編：天呀！好亂呀！）其實 Maison ES 總廚 Chef Esther 利用巴西及南美洲嘅食材，以法式烹調手法炮製出令一眾港女都非常熱愛嘅 tea set 小食，包括立體玫瑰花型果凍、黑色蝴蝶結芝士蛋糕、Brigadeiro 朱古力杯子蛋糕、法式橙香瑪德蓮貝殼蛋糕、黑朱古力夾熱情果芒果棉花糖等；品嚐完 tea set 仲可以得到 Melissa 匙扣以及其早秋系列優惠券！可以去買靚鞋！

Maison ES
地址：灣仔星街 No.1A（入口位於電氣街）
電話：2521 8011
供應日期：即日起至 9 月 25 日逢周末
收費：$488/2 位，包任飲咖啡及茶，設加一

火辣辣惹味燒烤

餐廳特別另設一個 corner 專放巴西美食，勁有巴西風情，而且仲有一個迷你耶穌山㖭，唔知大家搵唔搵到亮點呢？

巴西有乜名菜？食過呢個主題 buffet 你就知。灣仔嘅萬麗咖啡室以巴西作為新一輪 buffet 主題，供應十幾款巴西名菜，如炸雞肉芝士球、黑眼豆沙拉、木薯鮮蝦配椰子飯、巴西雞肉批、焦糖布甸、傳統 Brigadeiro 朱古力球等，當然唔少得最為港人認識嘅巴西燒烤啦，每晚均有不同嘅肉類一大串咁等住你！其他巴西菜式還有：巴西式燴魚柳、焗釀火薯茸牛肉絲、巴西黑豆燴雜肉等，食完包你變巴西菜達人。

小編採訪當晚有雞肉、豬肉、煙肉夾牛肉粒、羊架以及燒菠蘿，肉質嫩滑 juicy 又唔嚡口！

熱辣辣嘅巴西燒烤即場喺客人面前炮製，正！

除咗主題美食之外，餐廳其他美食亦相當出色，好似冷凍海鮮區有澳洲時令生蠔、阿拉斯加蟹腳、法國麵包蟹、大蜆、東風螺、三文魚、帶子、甜蝦、八爪魚等，係回本之選，啱晒一班海鮮控！熱盤亦很吸引，有香煎三文魚扒、即切肉眼扒、清蒸海上鮮等，最矚目係慢煮波士頓龍蝦，以 slow cook 方式保持龍蝦每一分鮮味。由頭吃到尾，見廚師不停 refill，客人就不斷排隊攞龍蝦！至於甜品，亦有超過 20 款選擇，包括朱古力撻、紅豆綠茶卷、豆腐花、朱古力布甸、芒果西米布甸、意大利芝士餅、朱古力噴泉、Haggen-Dazs 雪糕等，無論你係海鮮控抑或甜品控，都大滿足。

小編當晚就品嚐到 6 款凍海鮮，夠 fresh 之餘又多選擇！

廚師即場蒸焗波士頓龍蝦，令龍蝦肉非常鮮美，肉質亦很彈牙！

餐廳有 Haggen-Dazs 雪糕之餘，仲有呍呢嗱、士多啤梨、曲奇、朱古力以及咖啡 5 款口味選擇㖭！

餐廳仲特別炮製由番石榴、青檸等而成嘅 mocktail，酸酸甜甜很醒胃！

萬麗咖啡室
地址：灣仔港灣道 1 號香港萬麗海景酒店
電話：2802 8888
供應日期：即日起至 8 月 31 日
時間：6:30pm-10pm
收費：星期一至四成人 $568/ 位、小童（3-11 歲） $368/ 位，星期五至日及公眾假期成人 $588/ 位、小童（3-11 歲） $388/ 位，設加一
註：價錢已包任飲果汁、汽水。

8 月限定！奧運五環 cocktail

The Salted Pig 除咗推出一系列巴西地道菜之外，最吸睛就係呢 5 杯充滿奧運味道嘅特色 cocktail—有 Mango Caipirinha、Blueberry Caipirinha、Strawberry Caipirinha、Dark Caipirinha 以及 Sugarcane Caipirinha，每杯 $88。以巴西甘蔗酒為基調，再加入不同水果口味調配而成，小編推介 Strawberry Caipirinha，內有士多啤梨糖漿、新鮮士多啤梨、檸檬以及薄荷葉，酸酸甜甜，口感很清新醒神！