我講嘅係位於北角嘅「素食‧分子」。佢係一間摩登素菜店，兩年前開業，一直深受區內和素食者歡迎。裝潢以白色為主調，燈光明亮，走簡約 style。空間寬敞，氣氛都幾 casual 輕鬆，配合素菜形象，環境都有種好 light 嘅感覺。
唔好以為 Lunch buffet，價錢又咁大眾化，選擇一定好少。數一數，中西菜式多達 20 幾款；由中式老火湯、花時間炮製的節瓜甫、麻婆豆腐、創意菜鳯梨汁炒蓮藕、齋菜，到西式的 pizza、沙律、意式茄子、素肉醬番茄意粉都有，有焗有煮有炸，選擇好多元化，日日嚟食都有新意！
店長說，雖然午市 buffet 只是推出一個月，但每日都爆場，最多是在附近返工的 OL 及靚太們，更笑謂店中有道菜是每日不能缺少的，就係椰汁煮南瓜芋頭，有食客每次來到必食，試過有一日無煮，佢哋會有微言咁話。的確，賣相看似平平無，但食落芋頭夠軟腍，配以南瓜的香甜及椰汁的香，絕對可以送幾碗飯！必食推出還有榨菜青椒素肉煮節瓜。大廚說這道菜最花時間心機，用白菜蘿蔔等蔬菜熬成湯後，再用來慢煮節瓜甫，節瓜入晒味，清甜多汁，加上榨菜的微辣，惹味不淡寡。我作為肉食獸都被攻陷， $59 食足 90 分鐘，仲要免收加一，日日 green 都無問題！
供應時間：11:30am - 2:30pm（任食 90 分鐘）
收費：星期一至五 $59（不收加一）、星期六、日及公眾假期 $69 （不收加一）
榨菜青椒素肉煮節瓜，賣相與味道都一流。
用金不換及純芝士焗成的 pizza，鹹鹹香香，透出香草氣息，好吃。
每日熬製兩款不同湯水，是日精選有雜菜湯及赤小豆扁豆煲粉葛，去火。
稱得上是店內最受歡迎的椰汁煮芋頭南瓜，南瓜夠甜芋頭軟腍帶粉，加上椰汁的香，佐飯一流。
每日都不同飲品供應，除了豆漿及橙汁外，還會有芒果汁及菠蘿汁。
鳯梨汁炒蓮藕，甜甜地的蓮藕，食落又爽脆，好醒胃。
沙律 bar 選擇貴精不貴多，鮮甜不苦澀。
每日都座無虛席，深受 OL 及靚太們歡迎。
素食．分子
地址：北角堡壘街 2-4 號地下
電話：2856 6238
營業時間：11am - 22:30pm
文：Theo、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
