3 層式！巨型冰滴咖啡機！
飲開手工咖啡，一定聽過 Artisan Room。店中有部 3.5 呎高、仿歌德式設計嘅「Dutch Lab」巨形鋁製冰滴咖啡機，好搶眼！分 3 組滴漏運作，一次過可滴溜出 10 杯咖啡，又快又有質素，滴漏出嚟嘅咖啡仲帶有果香㖭！老闆更邀請世界咖啡比賽評判 Chester 作顧問，並引入意大利北部都靈百年歷史、昔日皇室御用咖啡品牌 Costadoro。Costadoro 咖啡豆來自巴西、哥斯達黎加及肯雅豆 3 個國家拼配而成，店子會特別將 3 個國家嘅咖啡豆分開低溫烘焙，並採用「氣冷式冷卻法」，將烘焙完成的咖啡豆進行冷卻，將濕度降至最低，避免變質，認真專門。
手沖單品咖啡 $60
Cafe 特別以壺嘴細小嘅銅壺手沖，方便控制水壓，令咖啡味道更均勻。並附上 tasting note 字條，畀客人了解單品咖啡嘅背景、特性。
沖繩黑糖泡沫鮮奶咖啡 $38 中杯
意大利 Costadoro 咖啡味頗濃厚滑身，有 after taste，黑糖的甜味香純。
櫃窗陳列鹹甜味 éclair、pound cake 及蛋批。
Artisan Room
地址：西環南里 8-12 號
電話：2565 3198
營業時間：7:30am - 10pm
即炒即沖新鮮靚啡
手沖咖啡可能好多 cafe 都有，不過唔係間間 cafe 都喺客人面前即炒咖啡豆再即手沖咖啡。觀塘 The Hunt 就好大膽地喺店子騰出空間，特別放置用嚟烘焙做 espresso 咖啡豆嘅大型炒豆機，又另闢空間放上微型炒豆機等工具，等一眾咖迷可以近距離睇到咖啡師手沖咖啡嘅過程，儼如一間手沖咖啡藝術館！店主之一 Mini 表示，即炒即沖嘅好處，就係避免咗咖啡豆擺放時間過長，影響咗咖啡豆嘅風味。除咗原味咖啡，這裏亦供應 coffee mocktail 飲品，將咖啡倒入果汁中同飲，令咖啡豆內嘅果香更為突出。
呢部由韓國入口嘅炒豆機 Proaster，一次過可炒十公斤咖啡豆，店內所有 espresso 系列嘅咖啡都由這機炒製。
手沖咖啡 $120
目前可選 Best of Panama 或 El Injerto，均是店子競投回港的獨家貨色，前者花香較香，酸度較高，後者則甜味較突出，酸度較輕。
Latte $38
奶泡打得綿滑，奶香與咖啡很 balanced。
Coffee Hawiian $52
將 espresso 倒入青檸汁、菠蘿汁飲，咖啡嘅酸香與菠蘿汁嘅酸甜很配搭，好 refresh，夏天飲最啱！
The HUNT Coffee & Roastery
地址：觀塘鴻圖道 75 號 KOHO 地下 A 及 B 舖
電話：2881 5533
營業時間：星期一至五 8:30am-9pm，星期六及日 11am-9pm
UCC 姊妹店！任挑咖啡沖調法！
位於沙田嘅 UCC 姊妹店──Mellow Brown 非常專業，主打精品咖啡之餘，客人可由咖啡豆、咖啡杯及沖調方法，全部自己揀選，真正實行 Create Your Own Coffee！
客人先從挑選咖啡豆，小編推介較為少見嘅巴拿馬藝妓咖啡，咖啡中帶花香及蜂蜜檸檬汁香，口感特別。另有危地馬拉、藍天咖啡、UCC 招牌咖啡及炭燒咖啡等。客人來到，先選咖啡，再選心水咖啡杯，再選擇自己喜愛嘅沖調方法。除咗有店子招牌嘅虹吸式咖啡外，另有手沖式及法式濾壓壺。比較特別嘅係法式濾壓壺，上枱時會畀客人一個小漏斗，4 分鐘後將壺上嘅手把按下來將咖啡粉壓至底部，當中嘅金屬濾網不吸咖啡油脂，咖啡 keep 到香濃嘅咖啡油香，客人可品嚐到最原始嘅咖啡風味！
Step 1：從 9 款咖啡豆中挑選啱心水嘅咖啡豆，包括 5 款單品咖啡、UCC 招牌咖啡及炭燒咖啡等。
Step 2 ：再揀喜愛嘅咖啡杯，有紅、黃、綠、黑 4 色選擇。
虹吸式
手沖式
法式濾壓壺
氮氣咖啡 (巴拿馬) $72、(哥斯達尼加) $54
賣相如黑啤，香氣濃郁，口感順滑，面層泡泡幼滑持久。
店子用上木系色調，牆身展示不同咖啡嘅沖調方法，夠晒「咖啡」味！
Mellow Brown
地址：沙田正街18號新城市廣場一期7樓706舖
電話：3586 0264
營業時間：星期一至五 11am-10:30pm、星期六、日及公眾假期 10am-10:30pm
文︰Joyce
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
