浪漫之選 1：豆腐火腩飯
層層疊肥瘦相間 漢年茶餐廳
佬飯中的佬飯，大家第一時間諗起豆腐火腩飯。邊間最好食？記者心水係大圍嘅漢年茶餐廳。這間店，以鹽焗雞出名，但我試過豆腐火腩飯，質素好高！茶餐廳格局，廚房仲要門常開，落咗單等緊嘅時候已聽到廚房傳出「哄哄」聲，齋聽已知勁有鑊氣！
豆腐火腿最重要係火腩，呢度嘅火腩有肥有瘦，肉連皮分 4 層，有層次得來肥瘦比例啱啱好，有肉香又有油脂甘香，質感仲好彈牙㖭！豆腐呢？經油炸過，但內裏依然非常滑溜，連埋少少鹹的芡汁食，正！
豆腐火腩飯 $48
豆腐火腩最重要就係火腩，呢度嘅火腩肉有肥有瘦，肉連皮分四層，有層次得來比例亦啱啱好，食落非常彈牙有口感，至於炸過的豆腐則非常滑，連埋少少鹹的汁食，不得了！
驚喜位是豆腐火腩下原來收埋咗一條菜，有菜有肉，罪惡感大減。
漢年茶餐廳
地址︰大圍積福街 100 號
電話︰2605 9355
營業時間：7am-7pm
浪漫之選 2：鹹蛋蒸肉餅飯
濃濃住家 Feel
鹹蛋蒸肉餅（配菜飯例湯）$70
男人的浪漫，仲有鹹蛋肉餅飯，呢款雖然唔係乜驚天動地菜式，但勝在夠住家，好有親切感，諗唔到食乜好，總會諗起佢。人人都知大坑民聲冰室的肉餅飯出名，我的心水還有荃灣的「肉餅哥」。呢度（口既）鹹蛋蒸肉餅，半個鹹蛋黃下有壓平咗（口既）蛋黃碎，免除了邊食邊壓碎蛋黃的麻煩，肉餅大概 3cm 厚，質地結實唔鬆散，食落唔乾嚡之餘，仲啖啖肉汁，配埋個堆到好高的菜飯，食完好滿足，真係好似返咗屋企開飯咁。
一坐低，飯都未點就已遞上的老火湯，湯有原隻雞腳及一大嚿紅蘿蔔，非常足料。
肉餅哥小炒料理
地址：荃灣聯仁街 28 號康睦庭園地下 3 號舖
電話：2886 8478
營業時間：12nn-4pm、6pm-10pm
浪漫之選 3：豉汁蒸魚飯
發哥老是常出現 麵留香茶餐廳
豉汁蒸䱽魚餐 $58
發哥除咗係平民 icon 外，仲鍾意周圍搵好嘢食，呢間「麵留香」能夠留得住發哥當然有一手，佢哋嘅蒸魚餐就係招牌。認真講，要蒸得一條好魚唔係一件易事，既要舖頭識得揀魚，又考廚師廚藝，火候最緊要，唔係間間茶餐廳都做得到。「麵留香」做嘅就唔同，用的䱽魚大小適中，剛好是一人份量，即點即蒸，魚看得出新鮮，而且火候啱啱好，肉僅熟很嫩滑，加上豉汁，惹味到極。
若魚肉配埋豆豉食，雖然較鹹，但一啖魚一啖飯就剛好，真係話咁易食晒成碗飯。
隨餐送例湯一碗，當日係合掌瓜煲豬骨，淨係豬骨都有一大嚿，足料。
唔係講笑，未入門口已經先畀佢哋貼喺門口的相片吸引，更發現有 3 個唔同造型的發哥合照，證明佢一定係常客，連發哥都 buy ，必跟。
麵留香茶餐廳
地址：太子花園街 215 號地下
電話：2380 3803
營業時間：6am-12mn
浪漫之選 4：鴨腿湯飯
靚陳皮 + 嫩鴨腿
陳皮鴨肉湯飯 $45
湯飯，係夏天同秋天（口既）恩物。男人點解咁 like？因為有湯飲囉！比起冬瓜粒湯飯，鴨肉湯飯更係麻甩湯飯之首，重點係啖啖肉；因為加咗陳皮，好適合夏天消暑食，體力勞動工作（口既）人最愛。濠苑的鴨腿湯飯質素不俗，用的陳皮是自家曬製，夠香夠醇無怪味；湯底也足料，聞起來有鴨香，但湯色清澈，不會泛着一層油，呷一口，清得來很鮮甜。鴨腿大大隻，最讚係夠腍夠滑，鴨肉一咬即散開，好味！
除鴨肉外，配料還有冬菇和冬瓜，完全吸收晒湯的精華，唔好錯過。
鴨肉誇張到有成個麵碗咁大，又飯又鴨又湯，個胃細啲真係食唔晒。
濠苑茶餐廳
地址：旺角太子道西 216 號
電話：2380 2650
營業時間：6:30am-7:30pm
文、攝：Froggie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
