CUTE 爆造型點心 放題攻略

點心專門店「點一龍」的點心水準一向穩陣，近年跟住潮流走，推出不少得意造型和特別配搭口味嘅點心，我不時都會去飲茶㗎。最近舖頭更推出放題，即刻試！放題點心款式多達三十幾款，蒸炸鹹甜都有，飽肚的粉麵飯不缺，仲有甜品。形式簡單，一邊吃一邊剔點心紙，上枱速度亦快，入座起計 2 個鐘，一定食得飽！而家每位客人更額外得到燕窩蛋撻 1 個，作為甜品前嘅甜品一流！最正最正係，餐廳現有特別優惠：凡 4 人同行惠顧，其中 1 位即可享免費，除番開每人都係百零蚊，同去酒樓飲茶差唔多，但就可以無限追加任吃，抵啦！


地方比一般點心店大，唔會坐到逼逼狹、背貼背。

Best Pick 6 大必吃
30 幾款點心睇到眼花，肚皮再大都未必食得完，等我 pick 出 6 大必食 items 畀你，等你重點攻擊！




熱辣辣金牌流沙包
一掰開個包，奶黃餡即刻流出來！要成功做出流沙效果，好講求蒸包時間火候，食得出師傅功架！另一讚位係奶黃調味恰到好處，吃到蛋黃濃香又不過甜，仲嗒到沙沙質感。不過記住記住記住，吃時要小心啲，唔好被「爆漿流沙」辣親嘴！


雪影金腿叉燒包
餐廳嘅招牌點心之一，外層嘅「白色雪山」，以金華火腿碎點綴，脆脆哋又香口；內有惹味叉燒餡，上桌時熱辣辣，好多人爭住點。


金獎潮州粉果
唔好以為呢隻賣萌熊貓仔只係得個樣，佢曾經係 2015 年「美食之最大賞」嘅金獎得主，造型 cute cute，唔捨得食；外皮煙煙韌韌，菜脯、冬菇、花生等足料有咬口，樣靚得嚟不失內涵。


迷戀冬瓜雞扎
以冬瓜片取代腐皮做雞扎，賣相比一般雞扎精美！冬瓜片既要透薄睇到內裏餡料，又要紥得實材料，很考點心師傅刀工和手藝。用料新派和揼本，內有火腿、蝦膠、蟹柳及雞件，味道比一般雞扎清新，有淡淡的鮮甜味；冬瓜盡吸餡料精華，入味 juicy，唔好錯過啊。


斑蘭欖仁馬拉糕
新派口味馬拉糕！傳統古法炮製出欖仁馬拉糕，加入斑蘭汁製作，變成青綠色！幸好綠色天然，食落口感超鬆軟，帶陣陣斑蘭清香，不太甜，令我諗起新加坡地道斑蘭蛋糕！


灰姑娘小南瓜
鮮橙小南瓜造型，吸睛又 kawaii！外表「有紋有路」，做工極精細！薄薄 QQ 嘅外皮，內有蓮蓉餡，都幾甜㗎！


迷人小冬菇
呢隻冬菇，去年熱爆點心界！今次放題都有得食，甜甜哋中式包以可可粉點綴，內餡當然係菇啦！有冬菇、瘦肉等餡料，菌香撲鼻又惹味，幾飽都要叫一籠。


鮮菜汁上素腸粉
史力加色青 BB 腸粉，原來加咗鮮波菜汁製，味道唔太覺有菜味，勝在有新鮮感；內裏有茶樹菇、生菜、蘿蔔絲，清新爽口。






點心放題仲有好多款式，好似蘿蔔糕伴蘿蔔，唔夠飽仲可以來碗秘製牛腩湯麵 / 河、蓮飄香鳳爪排骨蒸飯等；甜品嘛，我喜歡楊枝甘露。

點一龍
地址：灣仔軒尼詩道 314-324 號 W Square 4 樓
電話：2891 8689
放題供應日期：即日至 11 月 30 日
供應時間：星期一至五 （下午茶） 2pm-5:30pm、（晚市）6pm-10pm ，公眾假期除外
收費：（下午茶）成人 $138/ 位、小童（5-11 歲）及長者 $118/ 位；（晚市）成人 $178/ 位、小童（5-11 歲）及長者 $148/ 位
註：
(1) 任食限時 2 小時。
(2) 尖沙咀店及荃灣店亦有供應。
(3) 凡 4 人同行惠顧，其中 1 位即可享免費，
(4) 以上優惠設原價加一服務費。

文：Joyce、攝：基

歡迎你 like 我哋 U Food Facebook Page / U Food Instagram ，取得我哋更新更快嘅資訊！