1. 半世紀經典漢堡 時新快餐店
講起港式漢堡，不能不提時新快餐店！時新原來是間賣糖果、汽水嘅士多，後來才變成漢堡包小食店。漢堡扒用新鮮牛肉製，加入洋葱粒增加口感，又會混合蛋漿提升漢堡扒的黏度，令肉質唔會散開。每塊漢堡扒都用人手搓成，開賣至今老闆搓足半個世紀都未諗過停手。落足心思製作的漢堡，日賣 1,500 個，簡直是港式漢堡嘅代表！
漢堡包選擇多，除最基本的牛肉漢堡包，仲有漢堡蛋、芝士漢堡、雙層漢堡、雙層芝士蛋漢堡等，總共 8 款，款款都想食！
雙層漢堡芝士蛋 $23
全店最豐富、最大堆頭嘅漢堡！兩塊手搓漢堡夾住煎蛋，底層再有一片芝士。漢堡包仲可以揀茄汁、咖喱汁及黑椒汁。
漢堡包配以自家調配的沙律汁，酸甜清新，有助中和漢堡扒的油膩感覺。
漢堡扒即叫即煎，食落鬆軟又有肉味，肉汁四溢！
時新快餐店
地址：紅墈黃埔街 1A 地下
電話：2362 1279
營業時間：11am-9pm
2. 灣仔流心蛋漢堡 樂景快餐店
港島人唔想過海，香港區一樣有選擇，就係灣仔呢間有「港島區時新」之稱嘅樂景快餐店。小店開業差不多 40 年，餐牌選擇近百款，但最受歡迎的是漢堡包，每日至少賣出 100 個，係招牌！漢堡包有 5 款選擇，最基本的漢堡包只賣 $12，好平！要豐富啲，畀多 $3 就可以加芝士、蛋或火腿。最貴的芝士蛋漢堡包都只是 $18，就連價錢都是十年如一日！
芝士蛋漢堡包 $18
漢堡包全部即叫即做，廚師手腳快，唔使 5 分鐘就整好熱辣辣嘅漢堡包。
芝麻包的兩面都烘過，麵包微脆。漢堡包唔會乾爭爭，廚師會於麵包抹上番茄醬，很港式的味道！
漢堡扒用鮮牛肉，再加入洋葱及麵包糠打成。唔算好厚好大塊，食落牛味亦不太突出，但勝在質地夠實淨，軟硬適中，最讚是不會一咬即散開，同時又有肉汁滲出。
芝士只是簡單的選用即食芝士片，非常 home feel！最驚喜是中間夾住的荷包蛋，竟然是半熟狀態！一咬蛋汁即時唧出嚟，口腔隨即充滿蛋香，蛋汁又可以為漢堡扒增添濕潤度，加晒分！
樂景快餐店
地址：灣仔巴路士街 17 號地下
電話：2572 1843
營業時間：8am-9pm（星期日休息）
3. 慢煮 Upgrade 版港式漢堡 嘉寶小食
以為港式漢堡店一定好老套？好！介紹一間新啲、in 啲嘅小店！位於葵涌的嘉寶小食，可以話是港式漢堡包店的生力軍。傳統港式漢堡扒會加入調味料處理，好容易會因為過濕而導致肉質鬆散。呢間小店會於漢堡扒內混入燕麥，牛肉與燕麥以 1:1 的比例混合而成，令漢堡扒變得黏身之餘，不會過濕；同時加洋葱、蒜粒等，做出鬆化又有咬口的漢堡扒。老闆又覺得傳統港式漢堡好易煎到嚡口，所以出動絕招，將漢堡扒 slow cook 一個鐘，食落肉汁豐富、肉質唔會死實實，結合舊時風味和現代烹調，令味道提升。
芝士牛堡 $25/ 單點、$38/ 套餐
120g 嘅牛肉漢堡扒，厚約 1 吋。牛肉漢堡用咗冰鮮巴西牛肋肉製作，有肉味；經過慢煮後，質感更腍滑；配以自家製的蛋黃醬，簡單的食材配搭，做出令人回味的滋味。
日式芥辣雞堡 $20/ 單點、$33/ 套餐
唔食牛都有選擇，雞堡配以自家製芥辣蛋黃醬，甜甜哋又有 wasabi 的辣勁。雞髀肉都是慢煮處理，軟腍多汁。
單層泰式蝦堡 $32/ 單點、$45/ 套餐
小店除了牛肉漢堡是自製之外，蝦堡都是自己手打。自家打的蝦膠食落有鮮甜蝦味，而且很彈牙，炸得香脆兼惹味。
嘉寶小食
地址：葵興青山公路葵涌段 499 號光輝圍嘉寶大廈地下 I 舖（葵興邨旁）
電話：6125 8419
營業時間：12nn - 9pm（星期日休息）
文、攝：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
