《舌尖 2》好貨！重慶老火鍋登陸

最Hit食訊

發佈: 2016.10.13

文:

「渝味曉宇」喺 1995 年在重慶一條小街的地踎火鍋館，由老闆張平及太太熊孝禹開設，最勁爆係央視識貨，早於 2011 年已拍攝，在 2014 年播放、介紹重慶火鍋的《舌尖 2》一集裏，介紹了「渝味曉宇」枇杷山正街的本店，紅到成個中國都知。其實 2012 年舖頭已經響朵，由重慶人票選成「重慶火鍋 50 強」第一位。《舌尖 2》播出後短短 2 年，全國就開了 200 多間，而家只要跟國內人提起重慶火鍋，個個都噏得出佢名號，超有代表性。

香港店老闆廖小姐就是在重慶枇杷山正街老店試味，一試就決定要帶這重慶火鍋來港。

舖頭裝修超時尚，同國內帶點鄉村風的完全不一樣。

試業期間非常低調，但記者見來幫襯的不少是港漂帶着香港人、外國人朋友來烚下烚下。

香港店是加盟店，舖頭 9 月尾才試業；老闆廖小姐是福建人，因為太愛吃麻辣，親身上重慶，由當地人帶路試咗 15 間人氣、連鎖、大型小型重慶火鍋店，吃過渝味曉宇後，她說這間不是最麻、也不是最辣，但香氣香味卻最突出，50 強絕非浪得虛名，加上火鍋配料香港少見，覺得有潛力，於是就扑鎚帶來港。

《舌尖上的中國 2》介紹了「渝味曉宇」枇杷山正街老店，圖中的女士就是老闆娘熊孝禹。（樂視截圖）

《舌尖上的中國 2》，老闆張平每晚會剷 3 大鍋辣椒花椒做大紅鍋。（樂視截圖）

Sorry 咗先，重慶火鍋唔等於麻辣鍋，佢哋嘅招牌鍋底「麻辣大紅鍋」，卻堅威威、堅串，湯底係白開水唔係豬骨湯，用到清水做鍋底，皆因他們用全國最貴漢源花椒、百柱朝天紅 1 號辣椒及青海牛油熬出味。漢源辣椒係唐代貢品，唐太宗都 eat 喎；石柱朝天柱辣椒仲勁，辣度由 1 至 10 級，全國最辣。靈魂仲有大大嚿牛油，用青海牛脂肪提煉，奶白遇熱即化帶輕輕羶香味，一下鍋香氣撲鼻。呢啲原料都由總店提供，有幾香？唔使食都知，因為一行入舖，嗰朕牛油酥香味就撲入鼻，因為料實在太靚，除上述材料，仲加埋郫縣豆瓣、山東大蒜及貴州生薑剷成椒油，只加水已勁過加骨湯的湯底，堅勁。

曉宇麻辣大紅鍋 $158
見佢咁多辣椒，以為好辣，錯！半磚牛油下鍋，開火後，牛油香香，湯底花椒味突出啲，但煮煮下，用來涮苕粉、豆皮吸晒味，唔會鹹死，仲滲滿花椒香；但鍋底煮得 30 分鐘就嚟料，辣椒煮軟了，嘴唇感覺到灼熱，額角有汗出，但又唔會辣到脷痛痛，又唔會嗆喉，這時淥牛肉、牛肝超正，吃到我戀愛了。

曉宇鴛鴦鍋 $158
重慶人最地道的食法，一味選濃香的大紅鍋，一味選以蘋果、雪梨、馬蹄、香菜及清水的香果鍋，感到吃味太濃時，改以香果鍋灼配料，既清口腔，又有清潤效果。

若你係麻辣粉，鮮黃喉、毛肚、鵝腸、炸香酥肉、苕粉等火鍋料你可能吃慣，但呢度必吃的「孝禹十味」有 surprise，香港無得食嘅大刀牛肝、嫩牛肉、現炸豆皮、耗魚兒唔食就傻仔，豬膶大家吃得多，但牛肝原來更嫩更粉更滑，嫩牛肉用土薯粉撈過，激滑，烚久久不嚡；耗魚兒先神奇，雪冰了的剝皮魚一條，食慣游水海鮮的港人本來要蔑，但一放落大紅鍋煮，入晒味，魚肉又爽實又入味。另有 1 吋闊超粗身的黃喉，從牛胃下方取來的超嫩冰鎮稻田毛肚，仲有烚極都唔會融晒的現炸豆皮、香酥肉，仲有一道可當甜品吃的紅糖糍粑。我見識路摸上嚟的多是港漂，死跟無衰。

大力牛肝 $88
牛肝真係未吃過，呢度跟足總店供應這招牌菜，牛肝切得只有 1mm 薄，灼 1 分鐘就熟，用土薯粉撈過兼加個蛋黃，灼先撈勻蛋黃，淥久久都不會縮細太多，吃落又粉又嫩，唔會似膶咁多纖維。

曉宇嫩牛肉 $78
本地牛肉以土薯粉撈撈，黏滑的土薯粉可以做成一層包膜，令牛肉被大紅鍋熨至全熟，都不會流失太多肉汁，食落有咬口又無渣，淥熟啲吃入多啲大紅鍋味也不怕。

曉宇苕粉 $48
「孝禹十味」裏唯一由四川入口，煮久都不會滯身和爛，煙韌富 Q 感。

現炸豆皮 $58
找香港廠商製，即叫即炸，一開爐就放，吸晒牛油香味，口感有點似鮮枝竹，不過嚼感好。

紅糖糍粑 $68
糍粑其實是炸糯米，米磨得細似米糕，軟身綿糯，米香很濃，配紅糖漿當甜品吃。

重慶耗魚兒 $68
冰過的剝皮魚，一尾約 80-100g，魚味比香港買到的大條剝皮魚濃郁，放在紅鍋裏煮，骨肉一夾即分開，但又奇情地唔會散，魚肉結實，有少少鹹鮮味，滲咗紅鍋麻香辣味，清清地，食唔停。

清涼香茅凍（前）、下火枇杷凍各 $30
重慶人吃火鍋結尾會以冰粉解辣及清口腔，這裏做了升級版，以香茅及枇杷做冰粉，前者清新，後者吃來甘甘涼涼的。

唔記得講，火鍋精必讚嘅，係湯底無落一滴味精或添加劑，整間店只瀰漫純辣椒、花椒味，落街吹吹風，身上不留火鍋味，記者採訪當日，未爆場但都烚下烚下 1 小時，去打地鐡時已發現身上無味，吃火鍋後去蒲都唔失禮。