將紫薯變為法式甜品的舖頭「嘆甜品」喺屯門，屯門友話佢喺區內薄有名氣，而舖頭除了甜品外，亦有薯角、燒賣、雞翼和撈麵等小食供應，實行宵夜甜品一條龍。
紫薯焦糖燉蛋（配雪糕）$42
一上桌，有驚喜！紫薯燉蛋仲有雪糕配，一冷一熱好過癮，而且一個甜品有兩食，啱晒花心鬼。單睇形表，焦糖燉蛋面插咗大片紫薯乾，而雪糕旁亦放滿小紫薯乾，似模似樣。匙羹一舀，焦糖應聲裂開，燒得非常脆！
燉蛋滑溜，吃到濃郁蛋味；舀深一點，底層仲有紫薯蓉！雖然薄薄一層，勝在甜度剛好，而且紫薯蓉非常幼滑，輕輕淡淡的紫薯甜香又不減蛋味，非常有層次，好食。
燉蛋出色，但伴吃的雪糕就遜色。店員推介的新出品香蕉雪糕令人失望，雪糕一入口，腦海只有——香蕉精！味道非常假。
紫薯窩夫（配雪糕）$56
除咗燉蛋，仲有紫薯窩夫。窩夫上唧滿紫薯味的 cream，而且加上紫薯片、紫薯粒及雪糕，賣相好女仔好繽紛。
窩夫做得鬆軟，加上忌廉的紫薯味淡淡的，唔會食滯。配上脆身的薯片及薯粒，口感非常豐富，無論紫薯或窩夫迷都啱口味。
嘆甜品
地址：屯門井財街 15 號金銘大廈地下 4 號舖
電話：3689 6865
營業時間：4:30pm - 1:30am
文、攝：Froggie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
