深水甜品店一向都唔係外表行頭，呢區嘅甜品店、糖水舖全部都是靠實力！「三姐松記糖水」明白，甜品單靠靚樣唔可以儲到回頭客，最重要還是真材實料。所以最近舖頭推出嘅一系列紫薯甜品，都係 keep 住實而不華嘅宗旨。紫薯系列總共有 5 款甜品，店員話最好賣嘅係紫薯撈河及紫薯牛奶冰。
紫薯撈河 $32
撈河？甜品定鹹食呀？此河粉不同彼河粉，呢碗河粉其實是以椰汁混合蒟蒻粉製成，個樣似足河粉，但咬落爽口又有椰汁香！上面放咗一堆紫薯粒，分量一啲都唔孤寒㗎！單係呢堆紫薯都已經夠晒號召力！
甜品師傅話，河粉上面的紫薯蓉及紫薯粒全是新鮮的，每日將紫薯蒸熟去皮再切粒，紫薯粒夠腍身，味道香甜，而且無加糖調味，食嘅係百分百紫薯原味。撒少許芝麻增加口感，可惜芝麻味太突出，略嫌搶走少少紫薯味。
撈河唔係乾爭爭的，甜品師傅將忌廉奶加椰汁做成醬汁，與河粉面嘅紫薯蓉拌勻，椰汁變成粉紫色，好靚！紫薯食落增添了椰汁香，唔知點解又會帶啲荔枝味，好有趣！
紫薯牛奶冰 $33
呢杯粉紫色嘅飲品，賣相靚靚最啱呃 like！師傅話佢先將新鮮紫薯蒸好去皮，再磨成蓉。有柯打時才加奶及冰打成沙冰。
沙冰打得幼滑，可惜飲落紫薯味欠奉，仲有陣糖水味，還好唔係一陣唔自然嘅香精味，味道唔太甜。
地址：深水埗元州街 151 號地下
電話：2386 5835
營業時間：2:30pm-1:30am
文、攝：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
