邊間米綫店？就係 Mi.S.S.！舖頭推出新款鍋物——集打邊爐 + 鐵板燒於一「鍋」嘅 一人鐵板鍋，只賣 $78，比快餐店火鍋仲抵，咁新奇小編即刻衝去試玩！
鐵板鍋只係推出咗 3 日，已引起不少吃貨注意！試食當晚，小編目測有大約 7 至 8 枱爭相 order 鐵板鍋！
簡介下 Mi.S.S. 呢個鐵板鍋係乜冬冬先！型格黑色鐵鍋，好似鴛鴦鍋咁分成兩邊，但一邊高一邊矮，深的一邊用嚟打邊爐，而淺的一面就用嚟鐵板燒。
鐵板鍋有 2 款選擇，一款 $78，包 1 份北美特切牛肉或南美特切牛舌、1 份火鍋拼盤、1 份米綫及 1 杯熱飲或汽水。另一款 $88，同樣有 1 份火鍋拼盤、1 份米綫及 1 杯熱飲或汽水，不過就跟 1 份北美肩胛牛肉粒。
【冬日甜品】火焰 + 棉花糖 邪惡系西多士
柯打後，大家可以去自助醬料區。除咗有
番茄湯、
豬骨湯畀客人 refill 外，仲有
秘製豉油、
炸蒜、
麻醬及
花椒粉 4 款火鍋醬料任舀。店員 refill 快手，加湯加醬加料好 easy。可能在場客人多，店員似乎應接不瑕，落完 order 後要等 15 分鐘先陸續有火鍋料上枱。
見到鐵板鍋「實物」喇！與一人火鍋嘅大小差不多。上枱時，店員已將蛋漿倒在鐵板上，隨即開火。如果要 selfie，動作最好快少少，事關蛋漿係要嚟點牛肉，令牛肉更好味！掛住影相嘅話，蛋漿好快就變成蛋餅 （好似小編咁 T__T）！
至於火鍋湯底，小編揀咗
番茄濃湯，另可選
辣味番茄濃湯、
招牌惹味酸辣湯、
特色酸麻辣湯、
豬骨濃湯及
昆布濃湯等，好多選擇！番茄湯好濃郁，酸酸甜甜好開胃，最啱配牛肉，減輕牛肉嘅油膩感。
【相關報道】
激平！屋邨熟食檔$118 無限時任食串燒
南美特切牛舌
一碟大約有十幾片，仲有好多葱鋪喺牛舌上，分量多！
將
牛舌放喺鐵板燒，底面各燒約 1 分鐘就差不多食得！薄薄一片，一煎熟就會鬈起！連葱一齊食，牛舌味道更清爽，葱香牛香夾埋一齊，yummy！
北美肩胛牛肉粒
一碟 10 粒，有肥有瘦，size 的的骰骰，不過要注意火候，燒太耐會好韌。
火鍋拼盤
有 2 條蟹柳、2 條芝士腸、2 件午餐肉、2 件響鈴、少量金菇、2 片番茄、1 粒冬菇及少許生菜，花款唔少，分量都幾足。
【名店名物】
「三多」炸髀以外5 大隱秘名物
米綫
店子招牌 item，質地較腍身，吸咗番茄湯汁一流。不過要注意時間，大約 20 秒左右就得，唔係會好易「粉」碎兼好難夾起，仲有機會黐底㖭！
至於飲品，小編叫咗可樂，分量少，隔離枱都話飲品唔夠候，如果有「加大」選擇就更好。
仲未夠飽？唔緊要，有追加配料菜單，有肉有菜有餃有飯樣樣齊！
醒你！點食最滋味？
雖然樣樣嘢食都可以打邊爐或鐵板燒，但邊種食物配邊種做法好味啲？等我畀少少貼士你！北美特切牛肉本身油脂重，一煎出油，比較適合打邊爐，略略一灼已經好好味。而南美特切牛舌、北美肩胛牛肉粒就啱鐵板燒多啲，因為兩者較有咬口，經鐵板香煎後，適量油脂滲出，更香口。
計到最盡！點先最抵食？
經精明小編屈指一算，先 order 一個南美特切牛舌鐵板鍋 （$78），再追加一個北美肩胛牛肉粒（$33），計落只需 $111，比起 order 一個 $88 嘅北美肩胛牛肉粒鐵板鍋再追加南美特切牛舌（$30），平咗 $7 㗎！當然，同 frd 子一齊去，mix and match 更靈活。
地址：油麻地彌敦道 566-568 號僑建大廈地下
電話：2363 8339
供應時間：6pm-10pm
註：不設加一
文、攝：Joyce
【放題推介】
放縱食！4.5 小時任食牛扒 + 火鍋
【暖身之選】
拉芝！有飯焦！暖笠笠芝士煲仔飯
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【請您試食】一粥麵「麻椒醬油雞」及「去骨海南雞」套餐！↓
↓香濃嫩滑︱辣中帶麻︱立即免費換領↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
