1 台味夜市拌麵 ◎ 阿佳拌麵
台灣夜市嘅小食，真係好食到令人念念不忘！而家行入葵廣都食到台灣味！呢間新食店唔再喺 2 樓食街，而是於 3 樓近吉野家附近，好易搵！小店門面落足心思布置，門口整到成架鐵製手推車咁，台灣味十足！
只賣 10 款食物，價錢由 $15 至 $30 不等，主要是魚蛋、拌麵及現燙魷魚為主。拌麵係主打，有 5 款選擇。「
清心拌麵」即是滷水蛋加千頁豆腐、「
搖滾三品」就有花枝條、貢肉條及葱魚條，另有
雞肉蝦米餃、
燙魷魚及
招牌肉燥拌麵。每款拌麵都可以揀原味、沙茶、芝麻及麻辣醬汁。仲有 9 款配料可以追加，$5 至 $10 就交易。
招牌肉燥拌麵 $30
招牌集齊最台味嘅配料，有肉燥、千頁豆腐、酸蘿蔔及溏心蛋一隻。
麵條以醬油拌勻，沙茶醬好惹味。
溏心蛋超級流心，蛋味香濃。
鐵皮車仔上面，放咗一個 6 格嘅爐，入面浸住好多大大粒嘅
魚蛋，分別有
原味、咖喱、沙茶、麻辣及
海苔味。
地道夜市魚蛋 $15
海苔味魚蛋即是在原味魚蛋上，灑上海苔粉。紅油炸嘅魚蛋彈牙唔腥，可惜海苔味唔突出，食麻辣味正啲！
古早現燙魷魚 $25
魷魚都有原味、沙茶、麻辣味選擇，麻辣味麻香十足，唔係一味死辣，魷魚爽脆，唔錯！
阿佳拌麵
地址：葵芳葵涌廣場 3 樓 303 舖（吉野家隔離）
電話：從缺
營業時間：12nn-9:30pm
【相關連結】
食肉獸天堂！台北豪食 22 oz 牛肉邊爐
2 即製拉絲玉子燒 ◎ 魷味
開張只有 5 日！位於葵廣 1 樓死角位嘅「魷味」，於 lunch time 都引嚟好多學生幫襯，一定有佢過人之處！睇吓門前嘅餐牌，食物全部唔過 $35，難怪吸引咁多學生。
問老闆有乜好食，即刻推介玉子燒，仲要係即叫即製嘅！每份
玉子燒已經有
芝士、粟米及蟹子 3 款配料；如果嫌未滿足，仲可以加
蟹柳、煙肉、火腿、白蘑菇或
龍蝦沙律！
邪惡玉子燒 $28
$28 一份玉子燒，分量十足，當正餐食都得！蛋漿加咗日本味醂調味，中間嘅龍蝦沙律其實食唔到龍蝦肉，但沙律醬又增添酸甜味。最正是芝士可以做到拉絲，確係邪惡！玉子嘅外層仲鋪滿好多蟹籽，玉子軟綿綿加埋蟹籽脆卜卜口感，過癮！
大阪燒有肥牛、海鮮及煙肉3款餡料選擇。大阪燒唔係用現成整好嘅來貨，小店以大量椰菜絲加粉漿製成，有柯打再放在鐵板上煎焗。
日本大阪燒 $33
肥牛做配料嘅大阪燒，老實講真係食唔到肥牛。但椰菜絲爽脆多汁，煎香過帶有鐵板焦香，加埋沙律醬、日本燒汁、鰹魚絲等，都好惹味！
酥炸壽司 $22
鍾意食香口小食，可以試埋炸壽司。芝士腸炸壽司唔太油膩，壽司仲灑上椒鹽粉，又一邪惡之選！
魷味
地址：葵涌廣場 1 樓 B01C 舖
電話：從缺
營業時間：12nn-10pm
【和味放送】
北海道 + 加拿大 + 韓國 排隊平食三色海膽飯
3 $20 抵食意粉 ◎ Big Bite
Big Bite 喺葵廣唔算係新店，點解仲要介紹畀大家？因為啲嘢食真心平！意粉全部 $20、小食都係 $45 有找。
沙爹牛肉意粉 $20
小店有 6 款意粉，全部都係 $20！大路嘅有
番茄肉醬、白汁煙肉蘑菇、番茄肉丸等。想試特別啲？揀咗小店推介嘅沙嗲牛肉意粉。唔係港式茶餐廳嘅沙嗲牛，味道比較似印尼沙嗲，甜口啲又不失辛辣。
墨西哥玉米片 $22（醬汁另加 $8）
分量一啲都唔少！玉米片上放咗牛油果、酸忌廉及大量半融芝士。另加 $8 加埋墨西哥辣肉豆醬，辣辣哋好正！
Big Bite
地址：葵涌廣場 2 樓 C87A 舖
電話：從缺
營業時間：12nn-10pm
【得意小食】
挑戰物理學！金槍不倒芝士麵
4 自設茶園雲南靚茶 ◎ 3 Tea HK
食完濃味嘅墨西哥玉米片，想搵嘢飲解渴兼消膩，隔離店有新開嘅外賣茶店。茶店唔係台飲店，中文店名有 3 個「原」，代表原創、原味、原產地。老闆於雲南自設茶園，由種植、採摘、炒烘都可以完全控制。當中不加無味精及無添加，飲得更健康。
似苦非苦 $24
店內嘅蔬果茶總共 10 款，店員力推「似苦非苦」嘅苦瓜茶。蔬果茶底是雲南山茶，味道介乎紅茶與綠茶之間，沒茶嘅苦澀嚡口，反而有茶味回甘。店員會於茶內加入苦瓜汁，苦瓜味淡淡有甘香，好易入口。
每款茶都是用原茶浸泡，建議室溫飲用，飲得到茶味嘅甘、純、圓渾嘅口感。
紅棗薑茶 $35
薑茶同樣是山茶底，炒茶時已將薑混入茶葉中。薑味柔和不嗆喉，如果嫌薑味不足可以再加。紅棗則是先浸再與茶混合，愈浸得耐愈有紅棗甜味。
3 Tea HK
地址：葵涌廣場 2 樓 C87 舖
電話：2489 8266
營業時間：12nn-10pm
【韓風襲港】
韓國天藍小屋來港！20cm 滿到瀉水果冰沙
5 泰國師傅主理糕點 ◎ 泰糯米
泰國師傅主理嘅泰式糕點小店，店內嘅糕點全部 $4 件，抵食！糕點由泰國師傅製作，食材都係泰國貨！
泰式糕點 $4/ 件
傳統泰式糕點，右邊嘅千層糕有陣陣班蘭味幽香，質感煙韌。另有椰汁西米糕及流心糯米糕。
芒果糯米飯 $20
糯米飯經冷藏後，淋上自家製熱椰漿。糯米飯煙韌，椰漿及芒果香甜。
泰糯米
地址：葵涌廣場 2 樓 C10C
電話：從缺
營業時間：12nn-9pm
文：Jessie 攝：jay
【今期焦點】
熊本祭開催 部長變身火鍋店長！
【今期必食】
星戰迷必食！激光劍切 Star Wars 蛋糕
【掃食特區】
跟住星星掃街！深水埗 3 大最正小食
歡迎你 like 我哋 U Food Facebook Page / U Food Instagram ，取得我哋更新更快嘅資訊！
