闔家歡．冬大過年

最Hit食訊

發佈: 2011.03.24

文:

星級食家：山區麵包王
食家簡介：經常去山區工作，又鍾意食麵包，所以叫自己做山區麵包王。國內山區好多時真係無啖好食，所以出完差返哩，特別覺得晌香港真好，乜都有得食！更重要係，叫自己更珍惜每次飲飲食食，因為山區好多人都唔多夠食！

好耐無入嚟新城市廣場依邊食飯喇，就番其中一家，所以入咗嚟。趁著做冬，又可以一家人圍埋食番餐好嘅，今次揀小南國，無非都係貪佢水準穩定有質素，而且又有個闔家歡超值精選八人餐（原價$1,728，折實$1,488，唔包茶芥），人數啱晒，菜單又有佢哋嘅幾款招牌菜，符合晒我哋嘅要求！

小南國在港亦紮根多年，走嘅係中高檔路線，所以裝修、服務、食物質素都一向屬佳品，晌度食飯幾穩打穩紮。加上今晚主打都係嚟做冬，爆場都係定律，分兩輪都係飲食業搵錢嘅自然做法，早啲食早啲走啫，返到屋企都唔使搞咁夜。

一室象牙白主調，帶有通花嘅天花，晶瑩剔透波波水晶燈，都令環境雅緻不俗套。未上菜，先嚟一人一杯清潤雪梨水，晌依個冬日添添滋潤，總好過次次都係啤酒汽水，如果有得添飲就仲正！

前菜五小碟
5款冷盤前菜碟碟都做得幾骨子，加少少伴碟，觀感已好唔同，包括有：花雕醉雞、金瓜絲海蜇、涼拌茄子、四喜烤夫、糖醋小排骨，各具特色，5款都做得好食。
- 醉雞帶微微酒香，唔會蓋過雞鮮味，皮爽又肉滑。
- 金瓜即係南瓜，金瓜同海蜇都切成幼絲，望住絲嘅幼而修長，都睇出師傅刀功上乘。金瓜絲同海蜇絲都做到質感脆身，添少許麻油撈撈，不其然夾完一炷又一炷。
- 茄子切得長短勻一，又索足醬汁，加埋瓜身水份，咬落去汁液豐盈，軟腍度又適中。
- 烤夫（正寫為「烤麩」），好似海棉吸收晒醬汁，夠晒入味，甜中帶鹹，四喜通常指用金針、木耳、鮮冬筍、香菇，依個就用咗金針、木耳、毛豆，頂多只可叫三喜喎！
- 小排骨，排骨的的骰骰，主要食個糖醋汁，甜酸得嚟唔嗆喉。

清炒河蝦仁
可能你會嫌佢個賣相清得緊要，但神髓在於此。蝦仁雖然比較細粒，但炒得粒粒晶瑩，挑晒腸，誇張少少真係白裡透紅，既然清炒就係食佢河鮮味，所以雖有醋佐點，但都入口齋食，味道鮮甜清爽，再搞多啲「花臣嘢」，就破壞佢清炒之名。

砂窩雲吞雞
滔起位上，每位兩粒雲吞加棵小棠菜，湯頭色深鮮甜有雞鮮味，唔油膩；雲吞以鮮蝦豬肉為本，包得大大粒，穩打穩紥。雞肉另碟上，雖然隻雞係用作滾湯膽，但比預期中唔算點嚡，點點豉油我都食咗唔少。

椒鹽小黃魚
記得以前都係晌小南國食嘅小黃魚無依家咁大條，所以，叫小黃魚都唔多貼切。八人餐，一大碟共八條，唔使分，依然出色嘅小黃魚，就係皮脆肉嫩，師傅日日都唔知要炸幾多條，相信失手都機會細囉！

蟹粉燴魚肚
今餐無鮑參翅，有個肚（花膠），都幾好喎。魚肚我就視佢為高檔豬皮，依句都係講笑啫，兩者價錢差好遠，以前聽朋友講，有啲無良酒樓真係豬皮扮魚肚架。魚肚本身無乜味，重點在於佢嘅滋補價值，所以要搵啲相對味濃嘅汁醬嚟扣或燴。依碟魚肚燴得夠腍，咬落少少爽口，唔腥唔潺，配合蟹粉，無疑令個魚肚更貴氣，但足量嘅蟹粉令每啖更滋味。（題外話：原來豬皮本身都有好處，就係加速傷口埋口，不過食得多會吸收過量膽固醇。）

元蹄伴棠菜
期待嘅菜式，因為真係好難得食元蹄，平時散叫唔會點依道菜，通常啲人都話怕肥。難得係個餐嘅指定菜式，可以食過痛快。元蹄紅燒，醬汁非常濃稠，成隻元蹄都掛晒汁，一刀切開，清楚見到表皮、皮下脂肪、蹄肉。表皮軟腍，好似食緊肉凍咁；脂肪望落去就一定覺得肥，但食落唔算油；蹄肉被啲肥膏包住嚟炆，自然夠晒腍滑，所以就被大家搶得快，此外因為係全肉，無乜肥膏，點點醬汁就好好味。

上湯時蔬
其實都唔係點上湯，反而係一個加咗蛋白嘅厚「獻」，時蔬主要用菜心，加咗啲茶樹菇做點綴，只係為個套餐平衡吓，而作出嘅清菜間場，菜心鮮嫩，都OK嘅。

灌湯生煎包
通常套餐，總係臨尾安排粥粉麵飯，勢要客人飽到捧住個肚走，但今次個餐係以灌湯生煎包代替往常嘅傻麵，仲得我歡心，因為上面都食咗唔少嘢啦，真係飽得九乘十乘，來個灌湯生煎包倒有點特色。包底煎得香脆，包身鬆軟，豬肉餡亦醃得夠味且打得鬆化，唯「灌湯」有點不足。

桂花拉糕
拉糕亦即係上海年糕，係上海傳統食完年夜飯嘅飯後甜品，與「拉高」諧音，希望新一年晌財富同地位可以「拉高」「拉高」云云。蒸好嘅拉糕，加啲桂花糖，入口軟綿煙韌黏牙，雖未至於齒頰留香，但桂花糖唔太甜帶有清香。

冬又好，團年又好，闔家歡．開開心心食一餐，咁就已經好好！