生炒家傳芝麻糊
老闆 Alex 鍾意食芝麻糊，誇張到為了它才開這店。芝麻糊配方是同區老字號「鴻輝記」的家傳秘方，他每星期炒 30 斤芝麻，炒到腰酸背痛都係為好味。
芝麻糊要炒得夠香，一定要炒得出油份，所以批貨特別着重芝麻肉夠厚身，一炒一室香噴噴；連揀芝麻都講時令，最近便使用全國最優質的湛江芝麻，芝麻更要分批炒製，最初以小火炒熟芝麻肉，後轉大火逼出油與香味，由生炒到熟，每轉要炒 10 多分鐘，不停炒足 3 小時至金黃，乾身得可以捽得碎，就代表已除去芝麻的鐵銹味，粒粒均勻受火，可以跟米和水一同放在石磨裏磨成漿，加埋炒香的合桃粒，有對比的口感和新派的賣相都別具一格。
除了芝麻糊，馬來風喳咋、大良燉鮮奶等一樣跟足老店做法，新嘢則有配搭手拆柚肉做的 Home made 涼粉、楊枝甘露豆腐花及朱古力西米露等，新舊客都對晒胃口。
甜頭甜品
地址：荃灣沙咀道 328 號寶石大廈地下 G2A 舖
電話：5466 3308
酒店級原盅燉品
開張才一個多月的殿糖級請來出身於麗景酒店的五星級糕餅大廚坐鎮，自設中央工場，每日開舖前送來即日足料原盅燉品。
燉盅糖水比一般煲的糖水特別滋補，在於不經明火，用熱力逼出食材的原料原味，營養和味道特別強，而且唔熱氣。這裏供應家常款式，材料卻是不靚不用，如牛奶用日本 3.6 牛乳、龍皇杏、去核雞心棗等。老闆有做海味批發的親友幫手入貨，另每天凌晨會親自去果欄揀時令水果，回來再經工場人手挑選，好像椰皇，專揀椰肉純白色的，吃起來才夠香、肉厚，有時入 2 箱貨，因為只揀靚的，最後可能只用到 1.5 箱，生果更即日清，特別新鮮。這裏的燉品都是逐盅放料、逐盅燉，不是一大鍋煲好再放入燉盅，燉好再真空保鮮運到店舖，保持溫熱時也不會變質，以平實的價錢可以吃到如此水準，有 heart！
殿糖級
地址：天后電氣道66號地下
電話：2512 6881
傳統 X 新派
除了平日見慣見熟的中式糖水，坊間也有不少別出心裁的新派甜品，沿用傳統食材，加以新派賣相及配搭，精緻到估佢唔到係滋潤中式甜品！
芝麻梳乎厘 $38（糖品）：又脆又軟的麻蓉梳乎厘，底下是自家磨製的香滑芝麻糊，火候和時間控制得剛剛好，焗製後的芝麻糊特別香。
紅棗冰露 $30（糖品）：用紅棗做冰露全港首見，師傅把原粒雞心棗去核、加糖再加冰打碎至幼滑，啖啖清甜，入口即溶，另有糯米小丸子、水晶珠和紅棗肉，口感豐富。
椰皇紫晴湯圓 $36（糖品）：最高峰日賣 60 個，限量供應。內裏的糖水用 9:1 的椰青水和椰奶製成，保留了椰青的清香和清甜。一盅有 5 粒人手即日搓製的紫米皮奶皇湯圓。
紅豆心太軟 $44（糖品）：日本紅豆餡不像朱古力流心般熱氣，配上 75% 的比利時朱古力蛋糕，一甘一甜味道剛剛好，內裏有半融的朱古力漿和紅豆餡，跟 movenpick 雪糕一齊食仲正。
糖品
地址：筲箕灣東大街 42-52 號金來大廈地下 D 舖
電話：2796 7168
雪耳杞子杏仁糕 $52（沙田 18）：看到糕中的雪耳散佈如雲煙紋理，好靚！做到七份雪耳、三份杏汁的比例，前者柔軟帶爽口，後者散發淡淡杏香，吃完不用怕 heavy。
清補涼雪葩 $38 球（沙田 18）：家常涼茶比師傅由熱變凍，味道甜甜的，有少許藥材香，外有玉竹點綴的雪葩，裏面有煲過後再用糖煮的藥材粒，如龍眼肉、茨實等，有咬口，感覺好 Fresh！
紅棗軟蛋糕 $60（沙田 18）：鎮店之選，即叫即焗，一上桌就有陣陣香甜紅棗味，用上了 cream cheese，沒梳乎厘般易倒塌，外脆內軟，配茉莉花茶味雪糕。
沙田 18
地址：沙田澤祥街 18 號沙田凱悅酒店 4 樓
電話：3723 7932
骨膠原蜂蜜水晶 $38（甜品工房）：別以為只是普通水果啫喱，但其實含有豐富的骨膠原，以蜂蜜和玫瑰花茶帶出甜香，配上浸過骨膠原的水果粒，養顏最啱。
玫瑰蜂蜜蘆薈軟雪糕 $38 球（甜品工房）：少糖低脂的牛奶味雪糕，放上幫助消化的蘆薈粒，蘆薈粒用蜂蜜煮過後跟雪糕更 match，雪糕亦可轉配呍呢嗱味或 frozen yogurt。
寒天雨 $42（甜品工房）：日本寒天條跟烏冬十分似，口感比坊間的煙韌得多，還有營養豐富的沖繩黑糖當湯汁。
甜品工房
地址：尖沙咀厚福街 12-12A 號地下
電話：2732 2722
花膠水魚群薑汁燉鮮奶 $120 位（香宮）
皇牌甜品「甜品三重奏」，底部是燉奶，分別配水魚裙邊、印尼花膠件，另有杞子味及和有機黑糖味，高格矜貴，豐富膠質好養顏。
香宮
地址：尖沙咀麼地道 64 號九龍香格里拉大酒店地下 1 層
電話：2733 8754‧
(原文摘自《U Magazine》文：Silva、圖：Kam、Ken、Sky、nova)
