下午茶 必食茶餐廳

老牌蛇竇 隱秘重生

必蒲的有這間本來在匿埋喺渣甸街的老牌蛇竇，這裏經營超過 40 年，連食物都似老牌店般做到足，雞髀、多士、雞扒同薯條都係有柯打先炸，沙律又用新鮮生果加卡夫沙律醬撈、連雲吞同冬菇都係自己包自己炆。用料都落本，沙甸魚堅持用貴價的地捫唔用大陸貨、海南雞用 3 斤重的冰鮮雞、雞髀隻隻成 500 克重、蠔油冬菇刻意用菇味更濃的乾貨，第三代老闆陳先生話係父母堅決堅持的，有麝自然香，所以唔使做新派茶餐廳啲花巧食品，都有不少捧場客。

忠記咖啡室
地址：銅鑼灣怡和街 22 號（恒生銀行旁上）一樓
電話：2577 2242

冰室可樂雞翼

好多人三點三當正餐，去厭咗翠華太興，可以去呢間試吓。這店由一位可樂收藏家開設，全店幾乎都係紅色卡座，就算搭枱都好似有多啲私隱，坐得舒適。食物也同一般的茶餐廳好唔同，風格似中檔西餐，唔會有炒粉麵，反而有較高檔次的三文魚沙律、蘋果提子乾沙律、即炒意粉、連意大利飯、紐西蘭牛扒、美國穀飼安格斯肉眼扒同甜品都有，但又不失港人傳統，有多款茶餐。

必試有他們的可樂雞翼丁同全餐，整過可樂雞翼都知好難入到可樂味，但呢度的師傅肯花時間以可樂浸雞翼，雞翼食落真係有可樂味而唔只得一朕甜味，用嚟撈丁，銅鑼灣只此一家；全餐也做得有誠意，個番茄湯底夠濃，而且螺絲粉唔會煲到腍晒爛晒，最正係用香香餅店每早出爐的餐包同自家用沙律醬做的碎蛋，幾項心思已令這個全餐比坊間夠膽畀發水公仔麵你食嘅茶餐高層次好多。下午茶餐款式多，有迷你肉醬意粉、可樂雞翼丁、法式鵝肝醬法包多士、煙三文魚沙律、巴馬火腿沙律、潛艇熱狗及 Pizza 等 10 多款輪流推出，一星期都嚟食都唔會重複。

Triple King Cafe 三皇
地址：銅鑼灣謝斐道 483-499 號新城大廈地下 E & F 鋪
電話：2886 8989

超抵食澳門茶餐

而家啲茶記唔生性，收你 $40、$50，都夠膽畀發水公仔麵、化糊的通粉、腍晒嘅奶油豬你食，蛇在尖咀，首推這裏的下午茶餐，歎茶 $40 搞掂。餐廳招牌的澳門豬扒包、茄腩通、葡撻及澳門焗飯都納入下午茶套餐，連埋飲品，比午市同晚市單點平成 1/3，有啲 item 仲配多款小食，性價比在尖沙咀來說真係高到超晒班。地庫店茶餐供應時間更提早至 1:45pm，食飯時間唔係捉得咁準的上班族可以當午餐食。

估唔到連鎖茶餐廳連茶餐都做得十分認真，好似豬仔包、葡撻及雞批都係喺地庫店設餅房自己做，豬仔包同葡撻日日做過 5,000 個，供全港 5 間店使用，時刻出爐無停手，所以新鮮唔會隔夜焗腍晒。茄腩通以番茄加牛腩炆，鮮甜有茄味又無味精，有坑紋的通粉通粉實淨有彈性，係由澳門訂返來，跟餐記住加錢配澳門特式咖啡，同香港的凍咖啡好唔同，啡底超濃郁，而且多冰，面層更加咗一匙咖啡粉，飲完做到幾呆都成個醒晒。

澳門茶餐廳
地址：尖沙咀樂道 40-46 號華源大廈地庫 / 尖沙咀樂道 25-27 號
電話：2628 1990 / 2366 8148

(原文摘自《U Magazine》文：Snakeking、圖：May、Paul、Ki、Timmy、jay)