穀米上位 白米失勢
近年外國提倡「新食物金字塔」，新版在蔬菜及水果所佔比例有所提升，相對減少進食五穀類。另外，新版強調每天有 1/2 五穀類要係「高纖」的 whole grain 等。
營養師Leslie 說：「Whole grain 纖維量高，而白米或白麵粉都打磨過，含有 Vitman B 及 B 雜的『米胚』同埋含抗氧化物花青素的『米皮』都被磨走了。白米我們都仍可照食，只不過應該將每日兩碗的飯量，1/2 變做高纖的 whole grain，吃糙米、紅米、甚至紅米、紫米、綠米及野米等就得。」
要吃就吃‧加料米飯
這兩年多了有心小店做加料米飯，好像灣仔這家打正旗號的小店，做嘅是食肉獸都熟悉港式、韓式、日式和西式的碟頭飯，如豬扒、豚肉生薑燒、煙鴨胸、芝士魚柳及汁燒和牛等，不吃開健康餐或素食人士至少唔抗拒，健康位係飯底就變咗白米、紅米及糙米比例 1:1:1，而且每碟仲加了豆腐、雞髀菇、娃娃菜及生菜 8 款蔬菜，用意都係幫班食慣大魚大肉嘅都市人吸收多啲平日少吃的纖維。
豚肉生薑燒糙米飯 $41：豚肉醃得香口惹味，糙米飯不會過硬也不會太腍，有嚼頭及紅米甜味。
香葱豬扒荷蛋糙米飯 $42：豬扒以自家調味的甜醬油醃，肉味甜鮮，唔太韌，另加了些甜豉油佐味，糙米飯煲得煙韌，感覺較平日吃白米乾身，。這款肉類較多，配纖維成份甚多的糙米飯有助消化。
糙米家
地址：灣仔機利臣街 4 號地下
電話：3590 3346
健康Bento‧出籠
加料米飯唔係區區都搵到，一向做開蛋糕和輕怡 Deli food 的 C'est La B 最新的尖沙咀店，居然賣起華麗便當來。便當雖然沒有刻意標榜是健康的產物，不過在食物配搭上都配合健康原則，好像澱粉質佔便當裏的一半，另有一份沙律及小食，健康得來唔會一味得菜。而且烹飪上也以少油為原則，所以就算裏面有炸蝦或煎香雞、牛仔骨都不算油膩，食完飯盒底都乾乾爽爽，好過食茶記多油多醬汁嘅肥胖飯盒，附近返工嘅靚靚 OL Lunch 可以開懷大吃，唔使忍口。
Saigon Box $135：主菜是生薑香茅雞肉，雞肉烤得嫩滑又有香茅香，下面的是混了魚露的凍檬粉，輕怡開胃；另配炸雞及沙律菜。
Gangnam box $145：韓式牛仔骨醃得入味，牛仔骨再經煎香，牛味濃郁也鬆化，下面是少油的香葱蔬菜炒紅米飯，配菜餃子也不錯。
Canton Box $145：極有香港風味，以黑豆醬撈麵，配上炒蝦，麵條乾身又有醬油香，餃子跟 Gangnam Box 一樣，大隻皮煎得香脆。
Osaka Box $135：西日 fusion 便當，意粉配上以日式高湯清酒煮過的蜆，蜆肉新鮮，炸蝦炸得乾身唔油膩，當然也少不了配上一份沙律菜。
C'est La B
地址：尖沙咀廣東道17號海港城港威商場地下 G111 號舖
電話：3102 2838
Detox排毒靠沙津
Detox 概念都興咗一段時間，有關 Detox，連營養師都認同食沙律係幾得嘅！
營養師 Leslie 說：「環境污染這些外在因素就不為人控制，但放入口的自己就可以話事。加工或部分含人工色素的食物係 high toxicity。呢啲食物放入口之後，要代謝呢啲食物，就會產生「游離基」，它就是「毒素」。多啲飲水、食多啲含天然纖維素的沙律已經可以對抗『游離基』，因為纖維可以加速腸道蠕動，積存在腸內的廢物少咗，減少毒素產生，就可以 detox 咗啲『游離基』。」
變種沙律 Combo
沙律唔再 dull，廚魔先生加咗唔少「土炮」特產加落沙律度，如八珍甜醋加橄欖油、陳皮蝦膏配黑蒜、72 小時精煉青葱汁，連鹹檸都變埋沙律 dressing！連沙律配菜都唔係只係幾片三文魚或雞胸咁老土，用八珍甜醋煮的溫泉蛋、三文魚用日本醬油漬再火炙的方法處理，連即叫即炸的天婦羅同慢煮鷄絲都有，食草以後唔再口寡寡。
細心位仲有可以配埋他創作類似壽司卷的「寶老團」（Sushi Burito） 做 Combo 套餐，補充番澱粉質，廚魔將小炒概念偷換到壽司卷中，有無諗過壽司中間係粵式蒸魚、豉椒牛肉同四川辣雞，最正係手撕雞、牛肉、蒸魚都用咗少油 Slow Cook 的方法煮，保留到食材的營養，壽司飯又是糙米飯。
鹹檸三文魚沙律╳粵式蒸魚寶老團 Combo $68 ：三文魚以醬油漬方法浸一晚再火炙，菜以外還有炸紫菜，配了個以鹹檸及橄欖油打成的汁，酸香醒胃；寶老團餡料則以 60℃ 煮的鯛魚柳，超滑。淨計蔬菜，每份足足有 120g，勁大份。
鮮味尼斯沙律╳四川辣雞寶老團 Combo $68 ：蝦是沙律主角，用蝦米煉出來蝦米粉調味，還加了過低溫浸足幾天的陳皮汁。壽司中間則是撈了川椒油的麻醬。
Beautifood
地址：灣仔莊士敦道 60 號 J Senses 地下 3 號舖
電話：2860 0012
(原文摘自《U Magazine》文：sieg、圖：Ki、Sky、May、Kee、Paul)
