近年興起一陣「半自助餐」潮流，淨食自助吧上供應的食品又得，加配主菜亦得，份量多定少、價錢平定貴都有得自己選擇。
銅鑼灣一間西餐廳FRITES最近亦推出半任食Buffet，逢星期一至五午市供應，只需$98即可享用十多款沙律，11:45am-3pm期間3個多小時任食。
餐廳樓底夠高，落地玻璃設計開揚，中午自然光射入感覺舒服。
自助吧上放滿多盤沙律，以健康清新口味為主，選用食材包括藜麥、鷹嘴豆、紅菜頭、薯仔、西蘭花；特別推介脆卜卜的藜麥沙律，加入番茄仔和青豆，配搭美味又飽肚。
嫌單吃沙律不夠滿足，可以追加主菜，選擇統統都是餐廳的招牌食品，包括比目魚柳、香煎嫩雞扒、牛扒拼薯條，加配價錢由$58起。
食肉獸小編今次潛入，就order了香煎嫩雞扒和牛扒拼薯條，睇睇試食報告！
1. 香煎嫩雞扒（+$78）
選用厚雞胸，肉質細嫩不「嚡口」，以牛油和欖油輕煎香而不膩，不過酸豆比較強烈的味道未必人人受落呢~
2. 牛扒拼薯條（+$98）
安格斯牛扒重8安士，啱兩個朋友Share；牛扒本身肉味濃，亦帶香烤的油脂味道，塗抹松露牛油令層次更豐富，$100有找相當抵食！
厚薯條就有點美中不足啦，外脆內軟，不過小編就認為太鹹，對普遍香港人來講應該太重口味。
*另收加一
地點:銅鑼灣希雲街38號地下1號鋪
開放時間:
電話:2142-5233
文：HK港生活
