老闆娘 Gigi 是中泰混血兒，設計的菜式夾雜地道風味之餘，也加入很多創新意念。像自創的「Thaipas」（泰小碟），靈感便來自西班牙 Tapas，將泰菜做成細細碟，一改傳統的大堆頭形象，方便客人分享。香港少見的「炸女婿蛋」，是泰國地道小食，傳統做法是將雞蛋煲熟後再炸，Gigi 則改為用鵪鶉蛋，變成一口小吃，配酸酸甜甜的羅望子汁食，更加開胃惹味。
餐牌亦有不少傳統菜式，像咖喱炒蟹，大廚以黃咖喱粉、簡單香料調成咖喱汁，味道微辣溫和，配啖啖肉的肉蟹，又或撈飯食，各有滋味。甜品芒果煎糯米飯，則將糯米飯煎成小飯糰，外層香口、內裏煙韌，食落更富口感之餘，bite size 的糯米飯更容易與朋友分享，有創意！
特別推介：
芒果煎糯米飯 $78
芒果糯米飯的變奏版，將糯米煎至外層微焦脆，食落比傳統做法香口，配當造泰國芒果食，口感清新。
咖喱炒蟹 $338
咖喱汁辣度溫和，夾雜豐富蛋香，蟹肉吸收了咖喱汁精華，濃郁惹味。
炸魚鬆配青芒果沙律 $148
烏頭拆肉後炸香，口感香脆啖啖肉，配青芒果沙律吃，清新解膩。
炸通菜 $58
脆漿炸得薄脆，通菜條條分明，極考師傅烹調技巧，建議配沙爹汁品嘗。
炸女婿蛋 $58
以鵪鶉蛋代替傳統雞蛋，煲熟後再炸，口感外脆內嫩，蘸點羅望子汁食更開胃。
士多啤梨啤尾酒 $78、榴槤忘返 $68
餐廳供應一系列泰式風味 cocktail 和 mocktail，像士多啤梨啤尾酒，用泰啤、士多啤梨肉、果汁調成，帶清新莓香；mocktail 榴槤忘返則用榴槤、奶溝成，口感香滑。
Siam 28
地址：銅鑼灣軒尼詩道 525 號澳門逸園中心 28 樓
電話：3421 0472
營業時間：12nn-2:30pm、6pm-10:30pm
收費：現金及信用卡，設加一
交通：港鐵銅鑼灣站 D2 出口
泊車：銅鑼灣廣場二期 $30/hr
平均收費：$200
歡迎你 like 我哋 U Food Facebook Page / U Food Instagram ，取得我哋更新更快嘅資訊！
