一定要先介紹食客們嘅最愛──冰鎮海鮮：美國波士頓龍蝦、加拿大鱈場蟹腳、法國麵包蟹及美國藍青口等等，前菜則有鵝肝凍批伴車厘子醬、西班牙 Serrano 白毛豬火腿伴蜜瓜、北極蝦白酒啫喱、軟芝士煙三文魚卷，以及吞拿魚、帶子等新鮮刺身，品質非常新鮮。湯水則有中式原盅菜膽鮑魚燉雞湯，用上原隻鮑魚配以鮮雞及金華火腿等以慢火燉煮而成。至於熱盤方面，有以法國頂級 Rougie 鵝肝入饌嘅鵝肝慕絲雞肉卷、鵝肝瑤柱炒飯、鵝肝燉蛋、香煎鴨胸配鵝肝汁等等。
每間餐廳都會固定有冷盤、前菜、湯品以及熱盤。除咗上面嘅美食之外，小編最想推介嘅就係鐵板燒紐西蘭草飼牛肉眼牛扒、鐵板燒紐西蘭羊扒，以及燒西班牙帶骨黑毛豬扒配鵝肝汁，鐵板燒嘅燒肉充滿香味，又 juicy，聞到都令流晒口水。
另外亦設即煮即製嘅新加坡海鮮喇沙湯麵，以咖喱椰漿、香茅、南薑、芫荽、喇沙葉等香料熬製而成，食客可自選配料，如鮮蝦、蟹、魷魚、帶子、雞肉、魚片、豆卜等，由廚師即席烹調奉上，另外亦有即製各式印度咖喱、馬來西亞薄餅、飛天包。
甜品非常多選擇，主以水果炮製出各款特別嘅甜品，例如血橙啫喱杯、菠蘿意大利奶凍、檸檬撻、香芒豆腐慕絲餅、香芒芝士餅、香芒糯米卷、Häagen-Dazs 雪糕以及乳酪雪糕！
「味遊異國 – 美食之旅」自助晚餐
供應日期及時間：每晚 6:30pm-9:30pm
價錢：星期一至四 成人 HK$518/位、小童 HK$260/位；星期五至日及公眾假期 成人 HK$578/位、小童 HK$290/位
* 另設加一
Café East
地址：尖沙咀麼地道 72 號
電話：2313-4222
Facebook：http://www.facebook.com/nwmhk
歡迎你 like 我哋 U Food Facebook Page / U Food Instagram ，取得我哋更新更快嘅資訊！
