事實又一次證明，先入為主係傻瓜。入到嚟，有少少日本鐡皮屋台感覺，又有張正方形，坐成 10 人嘅 common table，而且全院滿座，全部都係青春活力嘅年輕人，喧喧鬧鬧，個氣氛正到呢...好似大家一齊開 party 咁。仲畀我霸到彈珠機嗰位，等我影張相打埋卡扮去咗新宿呃 like 先。
見啲侍應拎畀客嘅壽司沙律同定食都大件夾抵食，真係好啱到啲老死「些牙」。未食已覺得興奮，一於等我亂咁指，乜到叫一餐，睇下張點餐紙，啲菜名勁囉，有「龍捲風沙律」、「超級龍捲風卷」、仲有「火山」、「煙花」、「Rock & Roll」、「相樸力士」、「烈火紅唇」、「蕉魔」、「忍者雙辣」等卷物，啲名咁勁揪，叫住 4 款試下先。
以上全部都係創意卷物嚟，朋友話在場嘅所有食客都係為呢啲創意卷而來。呢啲卷物有出處㗎，原來舖頭前身是尖沙咀卷物專門店「古今」，大師傅係入行 40 年，曾在日本、紐約、加勒比海等酒店日工作嘅日本人，本來就擅長做壽司裏混合美國特式嘅卷物，幾個月前搬嚟觀塘，今次大師傅唔做主打，反而派出佢 3 位徒弟 Nick、Kenji 及 Chi 做台柱，繼續將創意卷物發揚光大。3 個男仔都係 80 後，但打飯工夫好好喎，唔好以為啲卷物咁多汁醬、咁多料就腍晒，我試過，夾起壽司卷唔會散，而且入口仲幾鬆化唔會實得得，米粒仲幾煙韌㖭，啲卷物醬汁，如鰻魚汁、Spicy Mayo、芥末醬等都係呢 3 個人自己製，spicy mayo 最好味，辣辣哋又有沙律醬酸香，對我呢啲沙律醬怪嚟講，落多多，我都同你吞得晒。
我最冧係嗰座「富士山」，下層唔太出奇，係鰻魚牛油果卷，但上面就係用蟹柳絲及薯片堆成嘅小富士山，香口脆卜卜，全部係界至愛；另一款「忘不了您」，雖然我唔明個名點解嚟，但一食消魂，餡是炸牛扒條及忌廉芝士，配上層的芒果肉，食肉獸都話夾埋芒果同牛肉食好 refreshing。壽司卷上枱，飯仲有少少暖，原來啲 sushi roll 全部即叫即製，等我叫多幾款，包到你哋 3 個後生仔廚師手軟先！
古今二
地址：觀塘觀塘道 436-446 號官塘工業中心 4 期 1 樓 B 室
電話：3188 8015
營業時間：星期一至六 12nn - 4pm、6pm - 11pm，星期日休息
備註：港鐡觀塘站 D4 出口出，下橋後往轉左直入
歡迎你 like 我哋 U Food Facebook Page / U Food Instagram ，取得我哋更新更快嘅資訊！
