我向台灣馬辣打聽過，噢！原來「馬辣」並非台灣嗰間「馬辣」，只係同名嘅台式火鍋店。不過唔緊要，只要同樣 sell 台味，我都有興趣試！話說我已經早兩日打去 book 枱，職員話已經 full 哂！我試下 7:30pm 去到 walk in，竟然可以即刻入，唔使等位，真幸運！
舖頭地方都算大，大部分都係卡位，啱晒香港人！裝修色調、燈光都有台灣店氣氛，暗暗的，地方寬敞，坐得舒服之餘又有 privacy。點菜模式跟台灣普通的馬辣差不多，肉類如豬牛羊剔紙仔任食，而丸類、蔬菜和其他食物就在大雪櫃度自取，似模似樣！
湯底唔夠辣
先揀湯底，有台式麻辣鍋、胡椒豬肚鍋、西紅柿洋葱海皇鍋、馬拉沙爹鍋等 8 款湯底選擇，可以一次過揀兩款，我揀咗台式麻辣鍋同西紅柿洋葱海皇鍋。
唔知係咪因為我係麻辣精，呷一口台式麻辣湯，不夠麻也不夠辣，雖然有職員 keep 住幫我哋加麻辣湯，但都係唔夠辣。
亮點！有台式火鍋料
火鍋配料種類都算多，唔計剔紙仔嘅 7 款肉類，大雪櫃入面就有 70 幾款食物！
單係雞牛鵝內臟已經有 14 款，仲有丸類、蔬菜、蜂巢豆腐、海帶等。
亮點係部分台灣配料，好似麻吉燒同甜不辣等，做出台式感覺！
小記推介吊桶，雖然細細隻，但新鮮又有鬚，好食！
一入座先上一碟海鮮，不過食完就無得 encore。
美國 CAB 安格斯黑牛脂肪平均，牛味較其他濃。
薑母茶任飲
打邊爐梗係要食番杯凍飲，汽水、梳打是必有吧，不過這裏仲有咖啡奶茶、薑母茶、檸檬茶、洛神花茶、柳丁汁（橙汁）、乳酪奶同夏枯草，款式多，而且不乏台式選擇。我飲過洛神花茶，味道不錯，甜度適中；竟然有埋乾花放喺度畀你自己沖花茶。想啤啤佢，又有獅威同嘉士伯任飲。
雪糕任舀
食飽飽唔係唔食甜品呀？雪糕櫃有 3 個！其中 2 個係可以自己畢雪糕，綠茶石板街菠蘿芝麻呂宋芒，當晚就有 7、8 款口味。我見大人小朋友都舀得超開心。
不過如果你同我一樣懶到出汁，可以食啲包裝好嘅，好似牛奶冰、紅豆雪條同雪米糍，總之一定揀到心水啦！
火鍋任食整體服務水準都好，職員會不時幫客人加湯和收拾；肉類任食第 1 round 嚟得好快，但因為人愈嚟愈多，都未等到第 2 round 肉嚟已經過咗 2 個鐘。
火鍋任食 2 小時放題
入座時間︰5pm - 9:30pm
成人 $148、小童 $98
入座時間︰9:30pm - 3am
成人 $128、小童 $98
（另收加一）
註︰星期五、六、假日，每位加 $10
馬辣台式鴛鴦火鍋
地址︰荃灣眾安街 55 號大鴻輝（荃灣）中心 8 樓
電話︰2614 6818
營業時間︰5pm-3am
文：Lou. Y
歡迎你 like 我哋 U Food Facebook Page / U Food Instagram ，取得我哋更新更快嘅資訊！
相關食肆：
