暴龍杯呢個名，真係夠晒霸氣！連個杯都與別不同，杯身特高，有暴龍公仔圖案，都幾 cute 嘅，亮點係分上下兩層！上層係食嘅，有薯角和炸雞粒，下層係飲品。最貼心係，上層間隔有個虛位，讓飲管穿過，咁就可以一邊食，一邊飲啦！而家只要買外賣飲品（變色果冰系列附外）加 $9（推廣價），就可將飲品升級為暴龍杯，作為小食，都算抵。
芒果蘆薈爽 16oz（升級暴龍杯） $33
除芒果蘆薈爽外亦可選擇其他的系列來加配暴龍杯（變色果冰除外），暴龍杯中有 3 粒雞粒及 5 條薯角。雞粒辣辣哋，外層夠脆，但略嫌炸粉太厚；一口 size，行街食啱晒！至於薯角略嫌沒醬汁點綴，如果附設茄汁就好了。
同時發現：幻彩變色特飲
變色幻彩嘅飲品喺今個夏天真係大行其道！無他，顏色夠 sharp 夠吸睛，又有夏日 feel 嘛！最近連許留山都推出變色果冰，有兩款口味，藍色的是藍柑橘荔枝味，紅色係香芒西柚味，即刻整番杯 po 相呃 like！
藍柑橘荔枝變色果冰 16oz $27
上桌時係漸變藍色，好夢幻！藍色部分其實係用天然柑橘皮製成的藍柑橘果糖漿，味道甘甘甜甜，加荔枝冰、芒果肉及芒果爽，果香突出兼感覺清爽。最邪惡係唧上忌廉及芒果朱古力粉。攪一攪，即刻變色！鮮藍色與忌廉混和，即刻變咗 baby blue！飲落荔枝味搶晒鏡，味道略甜，幸好有酸咪咪芒果肉中和番。
香芒西柚變色果冰 16oz $27
火紅燈色好有夏日 feel！底層係西柚味果糖漿，加啫喱、芒果肉、忌廉，亦有芒果朱古力粉。混和後變成粉橙色；西柚味濃，飲第一啖時會覺得澀，但飲飲吓反而中和咗芒果的酸甜，愈飲愈爽，解渴。
許留山
電話：2442 1882
文：Froggie、攝：Froggie、Paul
歡迎你 like 我哋 U Food Facebook Page / U Food Instagram ，取得我哋更新更快嘅資訊！
