劉在錫炸雞嚟喇！同佢 Selfie！

NeNe Chicken（讀音「呢呢」，即韓文「是，是」嘅意思）來頭一啲都唔簡單，炸雞店於1999 年成立，於韓國有過千間分店，係全韓國三大炸雞品牌之一，仲要請嚟人氣超勁嘅劉在錫 Oppa 代言，無得輸啦！


香港是 NeNe Chicken 第一間海外分店，揀咗最多潮人聚集嘅旺角朗豪坊，香港店嘅餐牌大部分會跟番韓國本店，NeNe 炸雞 、大葱炸雞、韓式甜辣炸雞、醬油炸雞等人氣 item 屬必試，仲會有香港限定嘅熱食菜式，遲啲會加埋香橙味及洋葱炸雞，令人期待！


NeNe 招牌炸雞 $158（有骨）/ $168（無骨）
NeNe 炸雞點解咁吸引？秘密就是用咗秘製炸粉漿，再用韓國空運到港、不含膽固醇嘅純正菜油高溫油炸，炸好嘅雞，皮脆到好似薯片咁，雞肉嘅肉汁完全保留到，食落品嫩滑唔乾身嚡口，就算放到凍咗，炸雞依然好脆！炸雞即叫即炸，熱辣辣、脆卜卜，極度吸引！大部分炸雞可以揀有骨或無骨，真係好體貼。


芝士潘朵拉炸雞 $198
注意！呢款係香港限定菜式！烘到脆身嘅農夫麵包，放咗極度邪惡嘅半融水牛芝士、車打芝士及蔬菜粒。旁邊嘅炸雞件用咗番茄忌廉汁去煮，好開胃。



食時將炸雞蘸滿水牛芝士，芝士嘅奶香味與帶酸甜嘅炸雞好夾。仲可以切開個麵包蘸芝士食，芝士怪點可以唔試？


大葱炸雞 $174（無骨）
炸雞店用 6 個月大嘅巴西雞，每隻約重 900 克，每一碟都用咗原隻雞切件製作。原雞會以 18 款天然食材及香料調製嘅調味粉，放入特製滾筒式醃雞機內醃 10 分鐘。大葱炸雞是於原味炸雞，放入用韓式醬汁調味嘅韓國大葱絲，帶啲蔬菜嘅清新感覺。


初雪炸雞 $178（有骨）/ $188（無骨）
NeNe Chicken 是韓國第一間推出呢款炸雞嘅舖頭。原味炸雞灑上大量調味車打芝士粉，芝士味超香！至於點解叫初雪？因為芝士粉好雪粉咁！嘩！好有 feel 呀！好浪漫！


韓式火辣炸雞 $178
將預先調味嘅原隻雞，蘸上 NeNe Chicken 自家製嘅韓式辣醬，味道超辛辣，好惹味。唔食得太辣，可揀甜辣味炸雞。

忌廉芝士炸雞伴泡菜炒飯 $188
除咗主打嘅炸雞之外，仲有其他韓式熱食提供，好似呢個香港獨有菜式，香脆嘅無骨炸雞、幼切薯條及泡菜炒飯，配以芝士忌廉醬汁，刺激開胃又惹味。食食吓，好想嗌杯啤酒呀！

勁量級雞蛋卷 $198
大堆頭大製作嘅蛋卷，用咗 20 隻雞蛋炮製！全條蛋卷長 45cm，分量勁到可以搵齊 10 個friend 開心 share！蛋卷入面有火腿粒，中間又有流心芝士，好有蛋香又唔會太飽滯。

芝士炒年糕併韓式豬血腸和炸紫菜粉絲卷 $158
口感煙韌嘅炒年糕上，淋上大量拉絲嘅水牛芝士。配韓式魚糕、香口嘅炸紫菜粉絲卷，及韓國人至愛嘅豬血腸，用嚟佐酒一流。

Shark Attack - Toy $88
呢杯係以伏特加 mix 藍色糖漿調成，鯊魚口會流出紅色嘅士多啤梨糖漿，好過癮！另有係酒精版本。

自家製芝士沙律
沙律菜上放上自家製嘅意大利芝士乳清、千島醬、橄欖粒及車打芝士絲，沙律菜爽脆，食得出新鮮。

食完炸雞啤酒好滿足，唯一美中不足是見唔到劉在錫！店門口有在錫紙板之外，職員又會於街頭派在錫紙牌，拼於香港景前影張相，再上載到個人 facebook / ig ，就有機會免費獲得芝士潘朵拉炸雞！於炸雞店內消費滿 $360，再參加神秘任務，即有機會拎走單人來回首爾機票，到時就可以飛去搵在錫哥啦！

NeNe Chicken
地址：旺角朗豪坊 11 樓 30 號舖
電話：3583 2933
營業時間：12nn-11pm

文：Jessie 、攝：Brian

相關報導：
劉在錫代言炸雞登陸
超好食！劉在錫炸雞即將到港！

歡迎你 like 我哋 U Food Facebook Page / U Food Instagram ，取得我哋更新更快嘅資訊！