重口味台灣臭豆腐鍋 香港有得食！

香港人真係好鍾意台灣美食！早排荃灣有間疑似著名台灣麻辣火鍋店開張，後來發現只係同名舖頭，依然照去！早幾日喺尖沙咀開咗間專食豆腐鍋嘅火鍋店「8 鍋臭臭鍋」，今次證實咗係台灣正貨喇，好滾動！


火鍋店由 3 位 80 後哈台族 Dani、 Anthony 及 Robert 所開，佢哋每次去台灣都要食臭豆腐鍋。熱愛到想喺香港開店，試過自己買臭豆腐鍋味粉試煮，點知味道強差人意！最後再於台灣遇上「8 鍋臭臭鍋」，發現可以用加盟形式開店，搵晒食材運送方法、邊度有得入貨等資料，做晒 report 去傾加盟，加埋學切菜、煮湯、調味、沖台式飲品等 3 個星期嘅 training，臭味就此傳入香港。


香港店大部分細節位都同台灣一樣，唯一唔同是香港唔係半自助形式，採用套餐形式，每份包湯底和指定配料。火鍋有臭豆腐鍋、臺式麻辣、芝士牛奶、藥膳羊肉、香蒜牛肉、酸辣羊肉、沙茶牛肉、原味海鮮、番茄素菜等 10 款選擇，全部都是一人一鍋嘅 size。為咗配合香港人乜都要快嘅性格，鍋料大部分已經預先煮熟，熱辣辣滾住上枱，可以即食！


招牌臭臭鍋 $98/ 午市（配飯及 350ml 飲品）、＄108/ 晚市（配飯）
每款鍋都會有大白菜墊底再加不同配料，好似招牌臭臭鍋就有米血糕、豬血、沙白蜆、鵪春蛋、大腸、粉絲、番茄、榨菜絲、金菇、嗚門卷、韮菜、貢丸、豬肉片及臭豆腐，共 14 款配料，好豐富！臭豆腐由台灣空運到港，沒經油炸，更能食出發酵嘅獨特味道。湯底用了牛骨加雜菜熬煮 10 多小時，再加入用 20 種材料調製嘅臭豆腐醬，湯底雖然是重口味，卻不會濃得嗆喉，或鹹到要狂飲水，連食過台灣店嘅客人都話食到台灣味！


芝士牛奶鍋 $98/ 午市（配飯及 350ml 飲品）
一樣有 14 款配料，豬肉片、心型魚豆腐、麻吉燒、烏冬、炸枝竹、凍豆腐、冬菇等。


湯底都是牛肉湯做 base，加淡奶及車打芝士煮成，既有奶味又有芝士嘅鹹香，難得煮得耐都唔會變得又濃又杰。


香蒜牛肉鍋 $98/ 午市（配飯及 350ml 飲品）
店內最受歡迎鍋物 top 3 之一，有甜不辣、福洲魚旦、牛肉片、蟹籽丸等 12 款配料。呢款鍋用咗豬骨湯底，加台灣總店秘製嘅蒜味高湯粉調味。唔好睇個湯底咁清，飲落蒜味即時爆發，但唔會辛辣刺鼻，繼臭臭鍋之外另一重口味之選！


除咗每款鍋 set 好嘅配料之外，仲可以追加火鍋配料，豬牛羊肉片、豬腸、米血糕、甜不辣等差不多 30 款，由 $8 至 $48 不等。


米血糕 $32


（左）甜不辣 $32、（右）心型魚豆腐 $35


台灣貢丸 $42


每張枱都放咗豆辦醬、沙茶醬及蒜蓉。嫌個鍋唔夠味，可以加 3 匙豆辦醬或沙茶醬、少許豉油及 1 匙蒜蓉。豆辦醬可以提升肉的味道，沙茶醬雖然好香，但略嫌味道太濃會蓋過肉味。


麻辣臭豆腐 $46
加埋火鍋料都仲未夠喉，店內仲有幾款小食提供。3 位負責人特意去台灣搵出最啱心水嘅臭豆腐，味道唔會太濃，比較易入口。臭豆腐用秘製麻辣醬汁浸煮，又臭又麻又辣，好過癮！


（左）多多綠 $26、（中）盆栽奶茶 $30、（右）泡沫奶綠 $28
火鍋店仲有 12 款飲品，做過台式飲品店嘅 Dani 話，佢哋用台灣茶葉沖茶。用滾水煮茶後再焗出味，然後放入茶爐保溫。茶底只可以 keep 4小時，否則茶會變苦澀影響味道，沖出嚟嘅飲品亦會杰身。多多綠即是益力多加綠茶，酸甜解膩。盆栽奶茶則是奶茶加可可粉，頂層放啲 Oreo 碎，好似甜品一樣。堂食之外，行入舖外賣拎走飲都得㗎！

8 鍋臭臭鍋
地址：尖沙咀金巴利道 77 號地舖
電話：2885 7867
營業時間：12nn-12mn

文、攝：Jessie

歡迎你 like 我哋 U Food Facebook Page / U Food Instagram ，取得我哋更新更快嘅資訊！