雞！全部都係雞！

最Hit食訊

發佈: 2016.08.16

文:

玩配搭！
鯨吞原隻炸雞連窩夫 Under Vacuum

炸原隻慢煮全雞窩夫 $98/ 份

位於尖東公園嘅 Under Vacuum 推出「炸原隻慢煮全雞窩夫」，用上約兩磅嘅冰鮮全雞，以香草香料醃過夜，再 slow cook 4 小時，收到 order 先將雞蘸粉及麵包糠等炸香。外皮薄兼香脆，慢煮雞肉夠嫩滑，而且店子亦細心地準備即棄手套，每日限量供應，想食請先預訂。

Under Vacuum
地址：尖東麼地道 61 號百週年紀念花園小食亭
電話：9325 6625
營業時間：11am-9pm

椰香雞！
台式獨食椰子雞鍋
香港人全年 365 日都打邊爐，火鍋亦經常推陳出新，最新嘅就係椰子雞鍋！位於尖沙咀嘅熱點推出「招牌竹笙椰子海南雞鍋」，湯底放咗椰子肉，仲熬咗個純雞湯來混合椰皇水，味道份外融和，雞件是浸熟的去骨海南雞，皮爽肉滑。每個小火鍋都配白飯及醬汁，分量不少。

招牌竹笙椰子海南雞鍋 $128

熱點
地址：尖沙咀加連威老道 18 號地下 B 舖
電話：3702 0019
營業時間：星期日至四 6pm-11:30pm，星期五、六及公眾假期前夕 6pm-12mn

脆炸雞！
自選脆皮雞排
喺台灣、內地超過二百間店舖嘅台式雞排店「魔法雞排」，配搭多達 48 款，由雞排口味、脆皮款式及調味粉，全部由客人自選，夠晒「度身訂造」心水雞排！柯打雞排要先選味道，有五香或香辣 2 款；再從 4 種選擇中揀選心水脆皮，有傳統嘅「台灣超級大雞排」、混入粟米粉嘅「多力滋雞排」、口感鬆脆嘅「拍手雞排」以及混合麵包粉嘅「胖果雞排」。最後揀埋調味粉就食得，非常講究。

左：拍手雞排 $30/ 塊、右：多力滋雞排 $30/ 塊

調味粉有海苔、咖喱、孜然、甘梅、胡椒及辣椒任揀。

魔法雞排
地址：紅磡德民街 1-15 號地下 A4A 舖（德民街與民泰街交界）
電話：2616 9926
營業時間：星期日至四 11:30am-11pm、星期五、六及公眾假期前夕 11:30am-12mn

去骨雞！
免噒骨雞翼包好包
免噒骨雞翼包，最啱懶人！呢個點子，係元朗「好包」大廚 Vincent 諗出嚟。將雞翼去骨，食落啖啖肉不特止，仲來個港式 X 西式嘅雞翼包，銷情即爆至日賣 150 個，成為元朗新一代名物。雞翼包有香蒜椒鹽、蜂蜜、青咖喱及西式香草醬 4 款，基本都係 Ciabatta 包 + 3 大隻去骨雞翼 + 配菜醬汁組成。醬汁 Pesto、青咖喱醬、麵包全由自家製，雞翼選用最大 size 嘅巴西雞翼，配菜有綠邊菜、溫室青瓜及紫洋葱等。

（左） 青咖喱雞翼包 $35
醬汁濃稠濃香，配菜也出色，綠邊菜薄身爽脆，溫室青瓜清甜，連同微辣嘅紫洋葱，為雞翼減膩。

（右） 蜂蜜雞翼包 $32
蜜糖 + 雞翼好似食緊 BBQ，好有親切感。特選菊花蜜取代一般蜂蜜，有花香清甜，沒搶雞翼鋒頭。味睇個包似手掌大，食完勁飽。

好包
地址：元朗西菁街 2 號興旺樓地下 1C 號舖
電話：6856 4772
營業時間：星期二至日12:30pm-8:30pm，星期一休息

果香雞！
重口味熱煮榴槤雞漁牧
原本只係季節性 gimmick，後來大賣到要放入 menu 嘅「果皇榴槤雞煲」，每煲即叫即製，先將部分榴槤肉及椰漿攪拌成醬汁，然後跟蒜頭、薑、乾葱等爆香嘅雞件混合，臨上枱再放多幾件金枕頭果肉。果肉掌溶，兼帶鹹鹹辣辣味道，好有新鮮感。

果皇榴槤雞煲 $298
用上足 6 両泰國金枕頭肉，既做醬汁，亦有原件果肉，「香」得徹底，粉絲實鍾意，跟雞件味道也夾。