店子由合和集團所開，集團老闆一直身體力行支持本地音樂人，主要透過提供場地讓他們表演，這間 1563 at the East 更是集 Live House 與餐廳於一身的新 project。在逾 6,000 呎的超大空間中，每晚都會請來不同的本地音樂人、團體來表演，為了提升 Live 的質素同互動性，店內使用的音樂設備都達演唱會級數，食客仲可在指定環節即興上台同音樂人 jam 歌。
講返食物，店子的菜式絕非一般 live music 酒吧的簡單貨色，走國際化路線。望望餐牌，選擇達幾十款之多，仲要中、日、韓、西式兼備，傳統新派口味都照顧周到。難得水準不錯，捨得用靚料又有創意，好似一道蔥㸆爐魚，用上本地有機貨，烹調前仲多了一個用稀釋了的醋浸製幾小時的步驟，煎出來的魚肉質不會鬆散，食落油香十足卻香而不膩；日系的牛肉咖喱炸包又用上神戶和牛粒去做，食吃來油香豐腴。
下酒小食也做得出色，這道特別的辣子雞，特地切得細細粒，再連十多款香料炸，粒粒都香脆入味，特別位是食完辣子雞餘下的大量辣椒香料，店子仲會即時幫你磨碎，等客人可以帶返屋企炒菜或撈麵食，一點都不浪費；連簡單一道炸雞翼都特地切成「反骨」再用本地蝦醬醃足一日才炸，食落鹹鮮味足又唔狼狽，夠晒窩心。店子仲計劃遲點因應各類表演而推出不同食物做 pairing，聽好音樂同食好嘢呢兩個願望可以在這裡一次過滿足晒！
神戶和牛咖喱炸包 $78
即叫即炸，炸得香脆不油的包內釀滿用香辛咖喱煮過的神戶牛肉粒，好惹味。
大澳蝦醬雞翼配青檸芒果醬 $108
雞翼用大澳的蝦醬醃過夜再炸，鹹鮮味足，配埋一大堆炸蒜，夠唒重口味，送酒一流。雞翼特地做成「反骨」狀，食落啖啖肉。
食雞翼加 $80 即可歎到這 set 名為 1563 的 cocktail。
特別的辣子雞 $128
帶骨的雞粒加入花椒、辣椒乾等近十款香料同炸，香脆入味，最特別的是食完雞粒後剩下的大量辣椒等香料，師傅會即時幫你打碎入樽，俾你拎返屋企撈麵，物盡其用。
私房蔥㸆活爐魚 $308
本地有機爐魚用醋醃過，肉質結實，接到柯打再煎香再加蔥煮，香而不膩。
原隻椰青焗波士頓龍蝦 $380
波士頓龍蝦先走油，再加新鮮椰青水、椰水同秋葵等配菜同煮，最後再混入椰汁，龍蝦彈牙，清甜帶椰香。
店內每晚都會有不同的本地音樂人/團體來表演，客人有興趣，仲可以在特定時段上去一齊jam。
1563 At The East Live House and Restaurant
地址：灣仔皇后大道東 183 號合和中心 6 樓
電話：2323 2538
營業時間：星期二、三及日: 11:30am-12mn 、星期四: 11:30am-1am 、星期五及六: 11:30am-3am 、星期一休息
收費：現金及信用卡，設加一
交通︰灣仔港鐵站 A3 出口
泊車︰合和中心停車場 $20/hr
平均消費：$300
文︰Amy、攝影：Ki
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
