必食爆膏大頭蝦 湄南
一入門就見到多盞鳥籠吊燈，仲利用鏡面裝飾加強空間感，配合埋簡單線條的越南風人像，好有特色。呢度主打東南亞菜，可試勻泰國、越南及馬來西亞風味，好似有炭燒豬頸肉青瓜沙律、燒牛柳沙律、海南雞、馬來咖喱牛腩、越式生牛肉河等。不過，識食一定要食大頭蝦，唔係形容懵豬，而係個蝦頭幾乎大過手板、爆晒膏嗰種。大頭蝦來自越南，隻隻重約五六百克，膏多肉爽甜，真係正！其中湄南珍寶大頭蝦肉丸湯，師傅用咗自家熬的蝦湯及番茄湯，混合兩者，味道超濃，而大頭蝦煎封過再烹調，蝦膏精華一滴不漏，湯內仲有手打新鮮豬肉丸、雜菌、豆腐及鮮番茄等，食完好飽。
湄南珍寶大頭蝦肉丸湯 （番茄湯底）$218
湄南軟殼蟹米紙卷 $68
摩登裝修，尤以鳥籠吊燈最搶眼。
店舖號碼：G02
營業時間：11am-10:30pm
電話：2771 7699
親子 comfort food WAALAH! Cafe
餐廳由銅鑼灣開到入來將軍澳，佈置型格，但超受家庭客歡迎，點解？皆因型裝背後，原來好 Kids friendly，單單睇吓餐廳右手邊，就知原因，有成大幅黑板畀小朋友發揮創意！開心到連大朋友都畫埋一份，仲有圖書、豆豆袋，坐低睇書又得。餐牌內有好多 comfort food，肉丸意粉、薯條、薄餅、全日早餐等，一家大細來開餐最啱。推介呢間分店獨家供應的薄餅，自製麵團做餅底，分 10 吋及 12 吋兩種，9 款口味有傳統有新派，最最最特別係喇沙蝦薄餅，竟然將自製喇沙醬取代番茄醬，鋪滿鮮蝦、紅洋葱、羅勒、脆條及辣椒，超惹味，加埋香脆批底，yummy！
喇沙蝦薄餅 $118（10吋）、$128（12吋）
鐵板蘋果香餅 $45
最得家庭客歡心，是這裡的大黑板及圖書 corner，小朋友開心玩，大人放心食。
店舖號碼：G03
營業時間：星期一至四 8am-11pm、星期五 8am-11:30pm、星期六 9am-11:30pm、星期日9am-11pm
電話：2529 6993
繽紛甜品屋 樂糖
不得了！入到樂糖，肯定畀繽紛可愛的佈置吸引住，一個個從天花板吊落嚟的手造玻璃汽球，五顏六色，好打耳。甜品款式同樣 colourful，仲花多眼亂㖭，流心蛋糕刨冰芭菲杯奶凍脆多士外，仲有加入份子料理元素做的甜品，好似金薯紫夢，一 set 有兩杯，大杯內甜點層層疊，有薑味寒天、黃番薯慕絲、紫番薯蓉、紫薯湯丸及白玉等，細細杯的，面層有薑味泡泡，下層係黃番薯糖水，食時可分開品嘗，或試試將細 shot 糖水倒入大杯內，番薯味、薑味自然更 match！
金薯紫夢 $52
魔鬼朱古力班㦸，士多啤梨汁配朱古力雪糕 $55
繽紛開心的佈置，好襯食甜品的心情。
店舖號碼：G06
營業時間：星期日至四 3:30pm-12:30am、星期五及六 3:30pm-1:30am
電話：6632 6600
PopWalk 天晉滙
地址：將軍澳唐俊街 12 號（港鐵將軍澳站 A 出口）
電話：2679 9300
文：Pam、攝：Nova
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
